२८ भदौ / अर्थ र व्यापार – नेपाल राष्ट्र बैंकले यस वर्ष पाँच, दश, बिस, पचास र सय रुपैयाँको १५ अर्ब रुपैयाँभन्दा बढीको नयाँ नोट बजारमा पठाउने भएको छ । राष्ट्र बैंकले बुधबारदेखि मुद्रा व्यवस्थापन विभाग थापाथलीका साथै तीन वाणिज्य बैंकको १६ शाखा कार्यालय मार्फत सर्वसाधारणलाई नयाँ नोट वितरणको थालनी गर्दैछ । 

गत वर्ष १० अर्ब ३१ करोडका नयाँ नोट वितरण गरिएकोमा यस बर्ष सोमबारसम्म ५ अर्ब ८४ करोड ५५ लाखका रूपैयाँको नयाँ नोट विभिन्न बैंक तथा वित्तिय संस्था र सरकारी कार्यालयलाई केन्द्रीय बैंकले वितरण गरिसकेको छ ।

गत वर्षहरुमा ७ दिन नयाँ नोट सटही सुविधा दिँदै आएको केन्द्रीय बैङ्कले यस वर्ष भने ३ दिन थप गरेर १० दिन वितरण गर्नेछ । अघिल्लो वर्षमा थापाथलीबाट मात्र नयाँ नोट वितरण गर्दे आएको राष्ट्र बैंकले यस बर्ष कृषि विकास बैङ्कको पाँच शाखा, नेपाल बैङ्कको पाँच शाखा र राष्ट्रिय वाणिज्य बैङ्कको ६ शाखा कार्यालयबाट प्रतिव्यक्ति २० हजार रुपैयाँको नयाँ नोट वितरण गर्न लागेको हो ।

राष्ट्र बैङ्क, मुद्रा व्यवस्थापन विभागका सटही काउण्टर पुगेर नयाँ नोट सहटी गर्नेले भने अन्य १६ स्थानको भन्दा थप ७ हजार गरि २७ हजार रुपैयाँको खुद्रा नयाँ नोट सहटी गर्न सक्ने छ । काठमाडौं उपत्यकामा राष्ट्र बैङ्कको थापाथली कार्यालयका साथै सर्वसाधारणलाई पायक पर्ने गरी अन्य १६ स्थान तथा भक्तपुरमा गुडविल फाइनान्सले समेत नयाँ नोट वितरण गर्नेछ । 

त्यसका साथै अन्य बैङ्क तथा वित्तीय संस्थाले पनि अघिल्ला बर्षहरुमा जस्तै आफ्ना ग्राहकलाई नयाँ नोटको सुविधा दिनेछन् । राष्ट्र बैङ्कको मुद्रा व्यवस्थापन विभागका अनुसार थापाथलीबाट टोकन मार्फत दैनिक २ हजार जनालाई नयाँ नोट वितरण गरिनेछ । अन्य १६ स्थानबाट प्रतिस्थान २०० जनाले नोट साट्न सक्ने छ । नयाँ नोट वितरण गर्दा पारदर्शिता अपनाउन मुद्रा व्यवस्थापन विभागले राष्ट्र बैंक सुपरिवेक्षण विभागलाई अनुगमनको लागि आग्रह गरिएको छ । 

यस्तै, राष्ट्र बैङ्कको आफ्नो पाँच क्षेत्रीय कार्यालय र राष्ट्रिय वाणिज्य बैंक र नेपाल बैंकमा राष्ट्र बैंकको ७७ ओटा नोट कोषबाट उपत्यका बाहिर रहेका स्थानीय स्तरको बैंक तथा वित्तिय संस्थालाई नयाँ नोट वितरण गर्नेछ । संबैधानिक नियाक, सरकारी कार्यालय, संस्थान, सेना, प्रहरी, लगायतका संघसंस्थाहरुले भने संस्थाको आधिकारिक पत्रको आधारमा भने भदौ ३० गतेसम्म सटही गर्नसक्ने छ ।