८ पुस/ अर्थ र व्यापार  - नेपाल स्टक एक्सचेञ्जले बिहीबार बेलुका कारोबार रोकेको सनराइज बैंक, हिमालयन बैंक, मेगा बैंक, र सांग्रीला डेभलपमेन्ट बैंकको शेयर कारोबार आइतबार खुलेको छ । मिसन डेभलपमेन्ट बैंकको भने अझै शेयर कारोबार खुलेको छैन ।चार बैंकहरुले नेप्सेलाई स्पष्टिकरणको जवाफ पठाएपछि कारोबार खुलेको हो भने मिसन डेभलपमेन्ट बैंकले भने जवाफ नपठाउँदा बैंकको आइतबार शेयर कारोबार खुल्न सकेको छैन ।

नेप्सेले मागेको स्पष्टिकरण सन्तोषजनक नभएपनि शेयरधनीको हितलाई ख्याल गर्दै चार बैंकको शेयर कारोबार भने खुला गरेको हो ।उक्त कम्पनीहरुले धितोपत्र बजारमूल्यलाई प्रभाव पार्ने सूचनाहरु तत्काल निर्णय हुनासाथ उपलब्ध गराउनुपर्नेमा उक्त कम्पनीहरुले नियमको पालना नगरेका कारण शेयर कारोबार रोकिएको थियो । नेप्सेले कारोबार खुला गरेको चारवटै कम्पनीलाई अब उप्रान्त नियम, विनियम तथा प्रचलित कानूनी व्यवस्थामा तोकिएबमोजिम गर्न र यस्ता गल्ती नदोहोर्याउन सचेत गराइएको नेप्सेले जनाएको छ । सूचीकरण नियमावली तथा नेप्सेको परिपत्र विपरितका कामहरु गरेको भन्दै नेप्सेले ती बैंकहरुको शेयर कारोबार बिहीबार बेलुका रोक्का गर्ने निर्णय गरेको थियो ।

धितोपत्र सूचीकरण विनियमावली २०७५ को दफा २२ को उपदफा १ को खण्ड ‘ङ’ मा गरिएको व्यवस्था अनुसार निर्णयका सूचनाहरु सञ्चालक समितिको बैठकको समय समेत उल्लेख गरी तोकिएको समयमा नेप्सेमार्फत सार्वजनिक गर्नु पर्ने हुन्छ । उक्त व्यवस्था विपरित सूचनाहरु उपलब्ध गराएको भन्दै नेप्सेले सुध्रिन दवाब दिन यस्तो निर्णय गरेको जनाएको थियो ।