१६ माघ /अर्थ र व्यापार - नबिल बैंकले चालू आर्थिक वर्षको दोस्रो त्रैमासिक अवधिमा आफ्नो खुद नाफा १८.४५ प्रतिशतले बढाउँदै दुई अर्ब १७ करोड ६८ लाख रूपैयाँ खुद नाफा आर्जन गरेको छ । बैंकको यो नाफा सबै वाणिज्य बैंकहरुभन्दा धेरै हो । 

इन्भेष्टमेन्ट बैंकले एक अर्ब ९७ करोड र राष्ट्रिय वाणिज्य बैंकले एक अर्ब ९६ करोड खुद नाफा कमाएर क्रमश दोस्रो र तेस्रो ठूलो स्थानमा छन् । निजी क्षेत्रबाट सञ्चालित बैंकहरुमा बलियो रुपमा प्रस्तुत गर्दै आएको तथा नेपालको धनाढ्य विनोद चौधरीको समेत लगानी रहेको यस बैंकले चालू आर्थिक वर्षको दोस्रो त्रैमासमा खराब कर्जा अनुपातमा उल्लेख्य सुधार गरेको छ ।

यस्तै समीक्षा अवधिमा बैंकले व्यवसायको आकार बढाउँदै प्रतिशेयर आम्दानीमा समेत उत्साहजनक प्रगति गरेको छ भने आफ्नो जगेडा कोषको आकार झण्डै दोब्बर बनाएको वित्तीय विवरण प्रकाशन गरेको छ ।