१९ असार / अर्थ र व्यापार – नेपाल ग्रामिण विकास बैंकले असार १२ गतेदेखि खुला गरेको रुरल माईक्रोफाइनान्सको ८८ हजार पाँच सय ६४ दशमलव ७४ कित्ता संस्थापक सेयर लिलाममा आवेदन गर्ने सोमबार अन्तिम दिन हो ।
नेपाल ग्रामीण बैंकले आफ्नो स्वामित्वमा रहेको रुरल माईक्रो फाईनान्स कम्पनीका संस्थापक सेयर साबिकका माईक्रोफाईनान्सको संस्थापक सेयरधनीलाई बेच्न यसअघि जेठ १६ देखि २२ गतेसम्म लिलामी खोलेको थियो । सो समयमा माईक्रोफाईनान्सका संस्थापकबाट एक कित्ता सेयरमा समेत आवेदन नपरेपछि हाल सर्वसाधारणले समेत आवेदन गर्न पाउने गरी लिलामी खुला गरिएको हो ।
ईच्छुक लगानीकर्ताले कम्पनीको लिलामी सेयरमा सोमबार कार्यालय समयभित्र विक्री प्रबन्धक एनएमबि क्यापिटलमा न्युनतम एक हजार कित्तादेखि सबै कित्ताका लागि आवेदन गर्न सकिने छ । बोलपत्र असार २० गते मंगलबार एनएमबि क्यापिटलमा दिउँसो ४ बजे खोलिने छ ।
रुरल माईक्रोफाईनान्सको संस्थापक सेयर नेपाल ग्रामिण विकास बैंकले पाँच सय एक रुपैयाँ न्युनतम मूल्य राखेर लिलाम बढाबढ मार्फत विक्री गर्न लागेका हो । यसबाट बैंकले प्रतिकित्ता ४०१ रुपैयाँको दरले न्युनतम तीन करोड ५४ लाख ७५ हजार रुपैयाँ बढि प्रिमियम संकलन गर्नेछ भने चार करोड ४३ लाख ७० हजार बढि आम्दानी गर्नेछ ।
संकलित प्रिमियम रकम नेपाल ग्रामीण बैंकको जगेडाकोषमा जम्मा हुने भएकाले सो रकम पछि लगानीकर्तालाई बोनस वितरणका लागि प्रयोग गर्नेछ ।
तपाईको प्रतिक्रिया