१७ पुस/ अर्थ र व्यापार - सूचीकृत कम्पनीहरुले शेयरधनीहरुलाई अधिक मात्रामा हकप्रद जारी गरेर चुक्ता पूँजी बढाउँदा धेरै कम्पनीहरूलाइ अवितरित हकप्रद लिलामी मार्फत बिक्री गर्नुपर्ने क्रम बढ्दो छ । यसै क्रममा जेबिल्स फाइनान्सको लिलामी शेयरमा आजसम्म आवेदन दिन सकिनेछ ।
जेबिल्स फाइनान्स (JEFL) को ९ लाख ९७ हजार कित्ता लिलामीमा शेयरमा आवेदन दिने आज (पुस १७ गते) अन्तिम दिन हो । फाइनान्सले संस्थापक समूहको ६ लाख ६५ हजार ९५५.५० कित्ता र सर्वसाधारणको ३ लाख ३१ हजार ६७२.५० कित्ता गरी ९ लाख ९७ हजार ६२८ कित्ता शेयर पुस १० गते देखि लिलामीमा ल्याएको हो । फाइनन्सको संस्थापक न्यूनतम एक हजार कित्ता र सर्वसाधारणतर्फ न्यूनतम १०० कित्ता शेयरको लागि आवेदन गर्नुपर्नेछ । शेयर खरिद गर्ने लगानीकर्ताले प्रतिशेयर एक सय रुपैयाँ भन्दा बढी मूल्य अंकित गरी बोलकबोल गर्न सकिने व्यवस्था छ ।

फाइनान्सको शेयर खरीद गर्न इच्छुकले सनराइज क्यापिटल कमलपोखरी र सनराइज बैंकको शाखा कार्यालय विराटनगर, वीरगञ्ज, बुटवल, पोखरा, नेपालगञ्ज, सुर्खेत र धनगढीको शाखा कार्यालयबाट लिलामी शेयर खरिदको आवेदन बुझाउन सकिनेछ । चुक्ता पुँजी ७३ करोड ८२ रुपैयाँ रहेको बैंकको चालु आर्थिक वर्षको पहिलो त्रैमास सम्ममा प्रतिशेयर आम्दानी ६४ पैसा, प्रतिशेयर नेटवर्थ ११३ रुपैयाँ ६४ पैसा छ । फाइनान्सको शेयरमूल्य धितोपत्रको दोस्रो बजारमा पुस १७ गते मंगलबार प्रतिकित्ता ११० रुपैयाँ हाराहारीमा कारोबार भैरहेको छ ।