३० जेठ / अर्थ र व्यापार - एभरेष्ट बैंकले ३३ प्रतिशत अर्थात तीन बराबर एक अनुपातमा हकप्रद निष्काशन गर्न सेयर धनी दर्ता पुस्तिका बन्द गर्ने मितिको चयन गरेको छ । बैंकले आगामी असार ७ गते हकप्रद प्रयोजनका लागि सेयरधनी दर्ता बन्द गर्नेछ ।
आगामी असार ६ गतेसम्म एभरेष्ट बैंकको हकप्रद खरिद गर्न चाहने ईच्छुक लगानीकर्ताले बैंकको सेयर किनीसकेको हुनुपर्नेछ । अथवा असार ६ गतेसम्म कायम रहेका सेयरधनी मात्र हकप्रद भर्न योग्य हुनेछन् ।
हाल कायम पूँजीको ३३ दशमलव ३३ प्रतिशतले हुने एक अर्ब ५३ करोड ३१ लाख रुपैंया बराबरको एक करोड ५० लाख ८८ हजार ८७ कित्ता हकप्रद बैंकले जारी गर्देछ ।
गत पुस २३ गते बसेको वार्षिक साधारण सभाले बैंकको ३३.३३ प्रतिशत हकप्रद जारी गर्ने प्रस्ताव पारित गरेको थियो । बैकको सेयर निष्काशनमा एनआईएल क्यापिटल रहेको छ ।
तेस्रो त्रैमाससम्ममा बैंकको चुक्ता पूँजी चार अर्ब ६० करोड ६४ लाख रुपैंयाँ रहेको छ । हकप्रदपछि बैंकको चुक्ता पूँजी छ अर्ब ११ करोड ५२ लाख रुपैयाँ नाध्नेछ । केही दिन अगाडि मात्रै बैंकले विशेष साधारणसभा मार्फत मर्ज तथा एक्विजिसनमा जाने प्रस्ताव पारित गरेको छ ।
हाल कम्पनीको ७० प्रतिशत संस्थापक सेयर रहेकोमा त्यसको १९ प्रतिशतलाई साधारणमा परिवर्तन गरी संस्थापकको ५१ र सर्बसाधारणको ४९ प्रतिशत हिस्सा कायम गर्ने प्रस्ताब पनि बैंकले पारित गरेको छ ।
तपाईको प्रतिक्रिया