९ पुस/ अर्थ र व्यापार - नेपाल राष्ट्र बैंकका गभर्नर डा. चिरञ्जीवी नेपालले डिजिटल प्रविधिको विकाससँगै बैंकिङ्ग क्षेत्रलाई सहज बनाएको बताएका छन् । बैंकिङ्ग, फाइनान्स एण्ड इन्स्योरेन्स अफ नेपालले आइतबार आयोजना गरेको डिजिटल प्रविधिले मानव जीवनमा ल्याएको परिवर्तन विषयक कार्यक्रममा उनले डिजिटल प्रविधिलाई प्रभावकारी ढङ्गबाट प्रयोग गर्न सके बैंकिङ्ग क्षेत्रको आर्थिक उन्नतिमा लाभ हुने बताए ।

मानवीय अर्थतन्त्र र प्रविधि एकअर्काको परिपूरकको रुपमा रहेको उनको भनाइ थियो । नेपाल बैङ्कर्स एशोसियशनका प्रमुख ज्ञानेन्द्रप्रसाद ढुङ्गानाले डिजिटल प्रविधिको विकाससँगै चुनौती थपिएकाले बैङ्किङ क्षेत्रलाई सहज हुन आग्रह गरे । प्रविधिका बारेमा बैंकिङ्ग क्षेत्रमा काम गर्ने सबै कर्मचारीलाई ज्ञान नहुनु आजको सबैभन्दा ठूलो चुनौती रहेको उनले बताए ।

सो अवसरमा नेपाल तथा भारतका विभिन्न बैंक तथा इन्स्योरेन्स कम्पनीका प्रतिनिधिले डिजिटल माध्यमबाट मानवीय क्षेत्रमा आएको सकारात्मक तथा नकारात्मक परिवर्तनका बारेमा छलफल गरेका थिए ।