६ पुस/ अर्थ र व्यापार  - वाणिज्य बैंक तथा वित्त कम्पनीहरुले निक्षेपको व्याजदरमा छाता संगठनमा सहमति गर्दै व्याजदर घटाए पछि विकास बैंकहरु पनि व्याजदर घटाउने अभियानमा लागेका छन् । यसका लागि शुक्रबार दिउँसो २ बजेका लागि डेभलपमेण्ट बैंकर्स संघको बैठक बोलाइएको छ ।

वाणिज्य बैंकहरुले आइतबारसम्ममा व्याजदर नघटाए आफुहरुले व्याज बढाउने चेतावनी राष्ट्र बैंकलाई दिएका विकास बैंकहरु वाणिज्य बैंकले व्याजदरमा नयाँ सहमति गरे पछि व्याजदर घटाउन जुटेका हुन् ।

दरबारमार्गमा बोलाइएको छलफलमा व्याजदरका विषयमा छलफल हुने एशोसिएसनका अध्यक्ष गोविन्दप्रसाद ढकालले बताए । एशोसिएसनका एक सदस्यका अनुसार अधिकतम ९.७५ प्रतिशतमा सहमति जुट्ने सम्भावना छ । यद्यपी धेरै विकास बैंकहरु १० प्रतिशतमा मुद्धती निक्षेप लिने योजनामा छन् । यस आधारमा विकास बैंकहरुले ९.७५ वा १० प्रतिशतमा सहमति जुटाउन सक्छन् ।
साधारण बचतमा भने फाइनान्स कम्पनीको सरह विकास बैंकहरुले यस अघिको ७ प्रतिशतलाई नै निरन्तरता दिने बुझिएको छ ।