८ पुस/ अर्थ र व्यापार  - चुक्ता पूँजी बृद्धि हुने गरी नेपाल राष्ट्र बैंकले बाणिज्य बैंकहरुलाई ‘काउन्टर साइकल क्यापिटल बफर’ कायम गर्न लगाउने भएको छ । २०७६ असार मसान्तसम्म यो ब्यवस्था गरिसक्ने राष्ट्र बैंकले जनाएको छ ।

काउन्टर साइकल बफर कायम गर्नका लागि राष्ट्र बैंकले नाफाबाट नगद लाभांसभन्दा बोनस शेयर वितरण गर्न लगाउने छ । अहिले बोनस शेयर वितरणका लागि ११ प्रतिशतको पूँजी कोष अनुपात कायम गर्नु पर्ने ब्यवस्था छ । यसलाई बढाउन खोजिएको हो ।
अन्तराष्ट्रिय मुद्रा कोष (आइएमएफ) ले पनि नेपाली बैंकहरु ऋण बिस्तारमा आक्रमक हुँदा जोखिम बढ्दै गएको भन्दै पूँजी बृद्धि गर्न सुझाव दिएको थियो । आइएमएफले बैंकहरुको आक्रामक नीतिका कारण यसलाई बढाएर साढे १३ प्रतिशत पुर्याउन सुझाब दिएको थियो । अहिले अधिकांस बैंकको पूँजी कोष अनुपात १२र१३ प्रतिशत छ ।

साढे १३ प्रतिशत कायम गर्नका लागि बैंकहरुले चुक्ता पूँजी बढाउनु पर्ने हुन्छ । नभए बैंकहरुले ऋण लगानी गर्न सक्दैनन् । आइएमएफको भनाइलाई मानेर जाँदा आधा दर्जन बैंकहरुलाई मात्र सहज अवस्था हुने छ । मुद्रा कोषको सुझाबभित्र रहेर डेपुटी गभर्नर शिवराज श्रेष्ठ नेतृत्वको मुद्रा तथा पूँजी बजारका समस्या समाधानका उपाय दिन बनेको कार्यदलले पनि पूँजी बढाउने संकेत गरेको हो । राष्ट्र बैंकले तीन बर्षअघि मात्र चुक्ता पूँजी चार गुणाले बढाएको थियो ।