२० माघ /अर्थ र व्यापार - छिमेक लघुवित्त  वित्तीय संस्थाले आफ्नो प्रगतिको रफ्तारलाई अझ बढाउनुको साथै जगेडा कोषलाई दोब्बर बनाएको वित्तीय विवरण आज(आइतबार)  सार्वजनिक गरेको छ । खुद नाफा, निक्षेप संकलन र कर्जा परिचालन लगायतका सबै सूचाङ्कमा गरेको सन्तुलित वृद्धिले संस्थागत सुशासन बलियो र सबल कम्पनीको नियमन र आड भरोसामा चल्ने संस्थाले सधै क्रमबद्ध प्रगति गर्ने इंकित गर्दछ ।

चालु आवको ६ महिना अवधिमा छिमेक लघुवित्तले ३९ करोड २३ लाख रुपैयाँ मुनाफा आर्जन गरेको छ । गत आवको पुस मसान्तको तुलनामा कम्पनीले ८१.६९ प्रतिशत अर्थात १७ करोड ६४ लाख रुपैयाँ धेरै नाफा कमाएको हो । गत आवको पुस मसान्तमा लघुवित्तले  २१ करोड ५९ लाख रूपैयाँ मात्र खुद नाफा आर्जन गरेको थियो । गत आर्थिक वर्षको पुस मसान्तको तुलनामा लघुवित्तको जगेडा कोषको आकार दोब्बर बनेको छ ।

समीक्षा अवधिमा जगेडा कोषको आकार ७३ करोड १० लाखबाट एक अर्ब ५६ करोड ११ लाख पुगेको हो। राष्ट्र बैंकको निर्देशन बमोजिम कम्पनीले छिमेक समाज सेवा संस्थाको नाममा गरेका लगानीहरू समेत जगेडा कोषमा सञ्चित गरेकाले जगेडा थप मजबुत बनेको हो । चुक्ता पूँजीभन्दा जगेडा कोष मजबुत रहेकाले कम्पनीको लगानीमा जोखिम ब्यवस्थापन धेरै सहज देखिन्छ ।