२७ साउन / अर्थ र व्यापार – भुकम्पले भवन क्षति भएपछि लैनचौर सरेको नेपाल राष्ट्र बैंकका केही विभाग दुई वर्षपछि बालुवाटार सरेको छ । २०७२ साल बैशाख १२ गते गएको महाभुकम्पका कारण राष्ट्र बैंक बालुवाटार कार्यालयमा रहेका चार वटा विभाग लैनचौरस्थित तत्कालिन प्रभु भवन (अहिलेको हाथवे) मा सरेको थियो । 

आफैले नियमन गर्ने संस्थामा विभागहरु सारेको भन्दै राष्ट्र बैंकका कर्मचारी संगठनहरुले उच्च ब्यवस्थापनको आलोचना गर्दै आएका थिए । राष्ट्र बैंकको मुल भवन नै भत्किएपछि सञ्चालक समितिको बैठक चौरमा बसेको थियो । अहिले पनि मुल भवन पुरै भत्काएर निर्माण कार्य चलिरहेको छ ।

भुकम्पपछि विकास बैंक सुपरिवेक्षण विभाग, वित्त कम्पनी सुपरिवेक्षण विभाग, लघुवित्त प्रबर्द्धन तथा सुपरिवेक्षण विभाग र समस्याग्रस्त संस्था रिजोलुसन महाशाखा प्रभु भवनमा सारिएको थियो । राष्ट्र बैंकले दुई बर्षभन्दा बढि समय लगाएर बालुवाटारमा नयाँ संरचना निर्माण गरेपछि ती विभाग फेरि आफ्नै पुर्वाधार भएको बालुवाटार कार्यालय परिसरभित्र सारिएको हो ।