२६ साउन / अर्थ र व्यापार – बिमा समितिले तोकेको चुक्ता पुँजी पुर्याउँन १८ बिमा कम्पनीले पुँजी वृद्धि योजना पेश गरेका छन् । बिमा समितिले २०७५ असार मसान्तसम्म निर्जीवन बिमा कम्पनीको चुक्ता पुँजी १ अर्ब र जीवन बिमा कम्पनीको चुक्ता पुँजी २ अर्ब रुपैयाँ पुर्याउन निर्देशन दिएको छ ।

१८ बिमा कम्पनीले पुँजी वृद्धिको योजना पेश गरेपनि सरकारी स्वामित्व रहेको राष्ट्रिय बिमा संस्था र राष्ट्रिय बिमा कम्पनीमा संस्थानले भने अर्थमन्त्रालयमा प्रस्ताव पठाएको र कम्पनीले भने म्याद मागेको छ । त्यस्तै, युनाइटेड इन्स्योरेन्सको २०७२–७३ को वासलात, प्राइम लाइफको २०६९ यताको वासलात स्वीकृत भएपछि मात्रै नाफा र सेयर धनिको कोष यकिन हुने भन्दै त्यसपछि मात्र समितिले योजना माग गर्ने भएको छ ।

नेपाल लाइफ इन्स्योरेन्सको बिमा समितिले तोकेको पुँजी पुगिसकेको छ । शिखर इन्स्योरेन्सको लगभग पुँजी पुगिसकेको छ र कम हुने पुँजी बोनस सेयर जारी गरेर जुटाउने भएको छ । विदेशी संस्थाको शाखाको रुपमा रहेका मेट लाइफ, ओरियन्टल इन्स्योरेन्स र नेशनल इन्स्योरेन्सले भने असाइन्ड क्यापिटल राख्न पर्नेछ । यस्तो शाखाको हैसियतमा रहेकाले सर्वसाधारणमा सेयर जारी गर्नु पर्दैन् ।

यी कम्पनीहरुले स्थगन कर जगेडा र विशेष जगेडा बाहेकका जेगडा कोषका रकमहरु, विदेशी मुल कम्पनीलाई भुक्तानी दिनुपर्ने लाभांश दायित्व भुक्तानी नदिएर पनि तोकिएको पुँजी बराबरको रकम देखाउन पाउने भएका छन् । तर विदेशी संयुक्त लगानीका कम्पनीले भने १५ देखि ३० प्रतिशत सेयर सर्वसाधारणको लागि छुट्याउनुपर्ने व्यवस्था छ ।