१८ पुस/अर्थ र व्यापार – ग्लोबल आइएमई बैंक १९ वर्षमा प्रवेश गरेको छ । बिहीबारदेखि यस बैंक आफ्नो १८ औँ वर्ष पूरा गरी १९ औँ वर्षमा प्रवेश गरेको हो ।
१८ औँ वार्षिकोत्सवको अवसरमा बिहीबार काठमाडौँमा आयोजित विशेष कार्यक्रममा बैंकका अध्यक्ष चन्द्रप्रसाद ढकालले सबैले मेहनत गरे केही समयभित्रै सबै प्यारामिटरमा ग्लोबल आइएमई बैंक देशकै अब्बल बैंक बन्ने दाबी गरे । उनले कर्मचारीहरूले आफ्नोपन सहित काम गरेको खण्डमा धेरै लाभ लिन सकिनेमा आफु ढुक्क रहेको बताए ।
नेपालमा रहेका कुनै पनि बैंकको डिपोजिट बराबरको रकम ग्लोबल आइएमई बैंकको सेभिङ डिपोजिट रहनु गौरवको विषय भएको भन्दै अध्यक्ष ढकालले ग्लोबल आइएमई बैंक र बैंकअन्तर्गतका रेमिट्यान्स कम्पनीमार्फत करिब ५० प्रतिशत रेमिट्यान्स भित्राउनु पनि बैंकका लागि खुसीको कुरा भएको बताए ।
‘कुनै बैंकको टोटल डिपोजिट बराबरको हाम्रो सेभिङ डिपोजिट छ , जुन चिज हाम्रो लागि धेरै गौरवको कुरा हो । हामी र हामी अन्तर्गतका रेमिट्यान्स कम्पनी तथा बैंकको हिसाबले करिब करिब ५० प्रतिशत जति रेमिट्यान्स हाम्रो च्यानलमार्फत भित्राएका छौँ, त्यो पनि आफैँमा धेरै ठुलो एचिभमेण्ट हो’अध्यक्ष ढकालले भने । अझै जुन हिसाबले डिपोजिट मोभिलाइजेशन भएको छ र जसले क्यापासिटी बढाएर यस बैंकलाई ब्राण्डिङ गरेको दावी गर्दै उनले यो हिसाबले अझै यस बैंकले धेरै काम गर्न सक्ने ठाउँ रहेको बताए ।
‘सम्पूर्ण बोर्ड, म्यानेजमेण्ट र सम्पूर्ण कर्मचारी साथीलाई म के भन्न चाहन्छु भने यो एउटा सानो कमर्सियल बैंकको सबैभन्दा सानो पोस्टमा काम सुरु गरेको व्यक्तिले १८÷२० वर्षको बिचमा नेपालको सबैभन्दा ठुलो बैंक, सबैभन्दा ठुलो नेटवर्क, सबैभन्दा ठुलो ब्यालेन्ससाइड भएको सानो इनिसिएसन लिएर इमानदार हिसाबले काम गर्न लाग्यो भने र अघि बढ्यो भने त्यो सम्भव हुने रहेछ भन्ने कुरा आज प्रमाणित भएको छ’ उनले भने ।
उनले हाल आफुहरुसँग करिब ४ हजार कर्मचारी र धेरै शेयर होल्डर भएको जानकारी गराउँदै उनले मेहनत अझै बढायौँ भने साइजको हिसाबले त सबैभन्दा ठुलो भएको , अझै हरेक प्यारामिटरमा नेपालको सबैभन्दा ठुलो बैंक र सबै प्यारामिटरमा अब्बल छौँ भन्ने कुरा प्रमाणित गर्नको लागि नतिजा दिन धेरै समय नलाग्ने बताए ।
उनले सबै कर्मचारीहरुलाई हरेक इण्डिभिजुअलमा यो मेरो बैंक, राम्रोसँग काम गरेको खण्डमा मेरो पनि भविष्य छ भन्ने गरी काम गरे यसबाट बेनिफिट धेरै लिन सकिने भएकाले सोही अनुसार काम गर्न आग्रह गरे ।
१८ औँ वार्षिकोत्सवको अवसरमा बैंकले बैंकका कार्ड बाहक ग्राहकहरूलाई दराजबाट सामान किन्दा १८ प्रतिशतसम्म छुट पाउने योजना ल्याएको छ । यस्तो छुट २४ पुससम्म रहने सो बैंकले जनाएको छ ।