२१ असोज/अर्थ र व्यापार – स्ट्यान्डर्ड चार्टर्ड बैंक नेपाल लिमिटेडले कर्णाली प्रदेशको वीरेन्द्रनगर, सुर्खेत र सुदूरपश्चिम प्रदेशको धनगढी, कैलालीमा एकैसाथ दुईवटा नयाँ शाखा कार्यालय सुरु गरेको छ । सो शाखा कार्यालयको स्थापनासँगै अब सो बैंकले नेपालका सातै प्रदेशमा आफ्नो शाखा पुगेको जनाएको छ ।
नेपाल राष्ट्र बैंकको एकीकृत निर्देशनअनुसार ‘क’ वर्गका बैंकले सबै प्रदेशमा कार्यालय स्थापना गर्नुपर्ने व्यवस्था रहेको छ । दुवै शाखा कार्यालयको उद्घाटन नेपाल राष्ट्र बैंकका गभर्नर महाप्रसाद अधिकारीले भर्चुअल रूपमा गरेका थिए । वीरेन्द्रनगर सुर्खेत शाखाको उद्घाटनमा कर्णाली प्रदेशका आर्थिक मामिला तथा योजनामन्त्री राजीवबिक्रम शाहको समेत उपस्थिति रहेको थियो । दुवै शाखाको उद्घाटन समारोहमा स्ट्यान्डर्ड चार्टर्ड बैंक नेपाल लिमिटेडको सञ्चालक समितिका सदस्य सिद्धान्तराज पाण्डेले सञ्चालक समितिको प्रतिनिधित्व गरेका थिए ।