१२ भदौ/अर्थ र व्यापार – भृकुटीमण्डपमा मंगलबारदेखि सुरु भएको १६औं ‘नाडा अटो शो २०२४’ मा गाडी कर्जा दिन विभिन्न बैंकहरुको प्रतिस्पर्धा गरेका छन ।
नयाँ गाडीमा मात्रै होइन, गाडी किन्नेका लागि कर्जा दिन बैंक तथा वित्तीय संस्थाले पनि सेवा शुल्कमा छुट तथा ब्याजदरमा छुट दिने अफर सञ्चालन गरेका छन् । बैंकहरूले कर्जा अवधिभरिका लागि एकल अंकको स्थिर ब्याजरदमा कर्जा योजना ल्याएका छन् । नबिल र ग्लोबल आईएमई बैंकले ७.९९ प्रतिशत ब्याजदरको कर्जा अफर ल्याएका हुन् ।
मंगलबार अर्थमन्त्री विष्णुप्रसाद पौडेलले उद्घाटन गरेको नाडा अटो शो १६ भदौसम्म चल्ने छ । शोमा दुई पाङ्ग्रे र चार पाङ्ग्रे तथा हलुका व्यावसायिक गाडीसहित विभिन्न ५५ ब्रान्डका गाडी प्रदर्शनीमा सहभागी छन् ।
शोमा सवारीसाधन, पार्टपुर्जा, वित्तीय सेवा एवं अन्य सम्बन्धित सरोकारवाला संघसंस्था मेलामा सहभागी छन् । हरेक वर्ष आयोजना हुने यो सवारीसाधन मेलामा बैंकहरूले समेत सवारी कर्जाको आकर्षक अफर प्रस्तुत गर्दै स्टल राख्दै आएका छन् ।
शोका लागि नै भनेर बैंकहरूले कर्जाको सेवा शुल्क र ब्याजदर छुट, कर्जा अवधि लगायत विशेष अफर ल्याउने गरेका छन् । यस वर्ष शोमा बैंकहरूका आठ स्टल छ भने एउटा बीमा कम्पनीको स्टल छ ।
गाडी खरिद गर्न चाहनेलाई लक्षित गर्दै बैंक तथा वित्तीय संस्थाले आकर्षक अफर सहितका कर्जा योजना ल्याएका छन् । राष्ट्र बैंकले विद्युतीय सवारीसाधन (ईभी) भन्दा इन्धनबाट चल्ने सवारीमा उपलब्ध गराउने कर्जा कडाइ गरेको छ ।
सोही अनुसार बैंकले पनि विद्युतीय र इन्धनबाट चल्ने सवारीका लागि फरक–फरक अफर ल्याएका छन् । बैंक तथा वित्तीय संस्थाका लगानीको हिसाबले अटोमोबाइल क्षेत्र सबैभन्दा पारदर्शी तथा कम जोखिमपूर्ण रहेको बैंकहरू नै बताउँछन् । तर, आर्थिक गतिविधि बढाउन योगदान दिए पनि उत्पादन, पूँजी निर्माण र आर्थिक वृद्धिमा सकारात्मक योगदान नदिएको भन्दै राष्ट्र बैंक अटोमोबाइलमा जाने कर्जामा अनुदार छ ।
गत आव राष्ट्र बैंकले ठूला र विलाशिताका गाडी खरिदमा प्रवाह हुने कर्जाको जोखिम भार १ सय ५० प्रतिशतसम्म तोकेको थियो । तर, चालु आव आउँदा गाडी कर्जाको जोखिम भार घटाइसकेको छ । राष्ट्र बैंकले ईभीलाई प्रोत्साहन गर्न २० प्रतिशत मात्रै डाउन पेमेन्ट गरेर ८० प्रतिशत कर्जा लगानी गर्न सक्ने व्यवस्था गरेको छ ।
इन्धनबाट चल्ने सवारीसाधनमा भने ५० प्रतिशत डाउन पेमेन्ट गरेर ५० प्रतिशत मात्रै कर्जा दिन सक्ने व्यवस्था राष्ट्र बैंकले गरेको छ । राष्ट्र बैंकले तोकेको नियामकीय व्यवस्थाभित्रै रहेर बैंकहरूले गाडी कर्जामा विभिन्न अफर ल्याएका छन् ।
विद्युतीय बाहेकका गाडीमा धितोको ५० प्रतिशतमात्रै ऋण दिने व्यवस्थाले बैंकमा तरलता हुँदा पनि अटोमोबाइलमा अपेक्षित ऋण नगएको व्यवसायी बताउँछन् ।

नाडा अटो शोमा यस्ता छन् बैंकका अफर
नाडा अटो शोभित्रै स्टल राखेको हिमालयन बैंकले ईभीमा आधार दरमा ०.५ प्रतिशत प्रिमियम थप गरी कर्जा दिने अफर ल्याएको छ ।
यस्तै इन्धनबाट चल्ने गाडीमा आधार दरमा ०.६५ प्रतिशत प्रिमियम रहेको बैंकले जनाएको छ । ईभीमा ८० प्रतिशतसम्म कर्जा दिने र अन्य गाडीमा भने ५० प्रतिशत मात्रै कर्जा सुविधा छ ।
वाणिज्य बैंकहरूलाई कर्जा दिँदा सेवा शुल्क ०.७५ प्रतिशत मात्रै लिन पाउने व्यवस्था राष्ट्र बैंकले गरेको छ । हिमालयनले भने नाडा अटो शो लक्षित गर्दै ०.५ प्रतिशत मात्रै सेवा शुल्क लिने जनाको छ । नाडा अटो शो अवधिमा बुक गर्नेले ब्याजदर र सेवा शुल्कमा बैंकले घोषणा गरेको छुट पाउनेछन् । बैंकले कर्जा अवधि बढीमा ८ वर्षको रहेको जनाएको छ ।
त्यस्तै लक्ष्मी सनराइज बैंकले पनि ईभीमा विशेष अफर ल्याएको छ । बैंकले ईभीमा नाडा स्पेसल अफर भन्दै ७ वर्षका लागि स्थिर ब्याजदरमा ८.९९ प्रतिशत ब्याजमा कर्जा अफर ल्याएको हो ।
शोमा सेवा शुल्क समेत ०.५ प्रतिशत मात्रै रहेको बैंकले जनाएको छ । अन्य गाडी खरिद गर्दा भने आधार दरमा १ प्रतिशत प्रिमियम अर्थात् ९.२५ प्रतिशत ब्याजदर रहेको बैंकले जनाएको छ । यस्तै बैंकले स्थिर ब्याजदर योजना पनि ल्याएको जनाएको छ ।
नबिल बैंकले पनि ५ वर्ष र ७ वर्षका लागि स्थिर ब्याजदरमा फरक–फरक अफर ल्याएको छ । ५ वर्षको कर्जा ८.२५ प्रतिशत ब्याजदर र ०.७५ प्रतिशत सेवा शुल्कमा कर्जा विद्युतीय र इन्धन दुवै सवारीसाधन कर्जा उपलब्ध गराउने बैंकले जनाएको छ ।
यस्तै ७ वर्षका लागि ८.४९ प्रतिशत ब्याजदरमा स्थिर कर्जा उपलब्ध गराउने भएको हो । यसमा पनि सेवा शुल्क ०.७५ प्रतिशत नै छ ।
त्यसैगरी सानिमा बैंकले ७ वर्षसम्मको स्थिर ब्याजदरमा कर्जा अफर ल्याएको छ । सबै गाडी खरिदमा ७ वर्षका लागि ८.४९ प्रतिशत स्थिर ब्याजदरमा नै कर्जा दिने बैंकले जनाएको छ ।
यस्तै सबै गाडी खरिद कर्जामा सेवा शुल्क पनि ०.५ प्रतिशत मात्रै लाग्ने बैंकले जनाएको छ । फेस्टिभ अफरका लागि बैंकले ल्याएको उक्त योजना तिहारसम्म लागु हुनेछ ।
ग्लोबल आईएमई बैंकले ईभीमा ७.९९ प्रतिशत ब्याजदरमा नै ५ वर्षका लागि स्थिर ब्याजदर भएको कर्जा दिने भएको हो । ५ वर्षभन्दा माथि अवधिका लागि भने ८.४९ प्रतिशत ब्याजदर छ । अन्य गाडीमा ८.४९ प्रतिशत स्थिर ब्याजदरको कर्जा योजना ल्याएको छ ।
५ वर्षसम्मका लागि ८.४९ प्रतिशत ब्याजदर भए पनि ५ वर्षभन्दा माथिको कर्जा अवधि भए ९.४९ प्रतिशतको स्थिर ब्याजदर रहेको बैंकले जनाएको छ । सेवा शुल्क ०.७५ प्रतिशत रहेको बैंकले जनाएको छ ।
त्यस्तै नेपाल इन्भेस्टमेन्ट मेगा बैंकले ईभीमा आधार दरमा १ प्रतिशत प्रिमियम थप गरी कर्जा दिने योजना ल्याएको छ । ७ वर्षको अधिकतम अवधि रहेको कर्जामा ०.५ प्रतिशत सेवा शुल्क रहेको छ । ५० लाखभन्दा सानो कर्जामा भने कर्जा अवधि ५ वर्षसम्म मात्रै रहेको छ । इन्धनबाट चल्ने गाडीमा भने आधार दरमा २ प्रतिशत प्रिमियम रहेको बैंकले जनाएको छ । यसमा पनि सेवा शुल्क भने ०.५ प्रतिशत छ ।
इन्धनबाट चल्ने गाडीमा पनि कमर्सियल भए ८० प्रतिशत कर्जा पाइने बैंकले जनाएको छ ।
कृषि विकास बैंकले ब्याजदरमा ८२ प्रतिशत र सेवा शुल्कमा ३३ प्रतिशतको छुट योजना ल्याएको छ । बैंकले आधार दरमा १ प्रतिशतको फ्लोटिङ ब्याजदरको कर्जा योजना भए पनि नाडा अटो शोमा प्रिमियममा ८२ प्रतिशत छुटसहित ७.९९ प्रतिशत ब्याजदरमा कर्जा योजना ल्याएको जनाएको छ ।
अर्को त्रैममासबाट भने आधार दरमा १ प्रतिशत प्रिमियम लाग्ने बैंकले जनाएको छ । यस्तै ७ वर्षका लागि ८.९९ प्रतिशत स्थिर ब्याजरमा बैंकले कर्जा दिने जनाएको छ । बैंकले सेवा शुल्क ०.७५ प्रतिशत भए पनि नाडा अटो शोका लागि ३३ प्रतिशत छुटसहित ०.५ प्रतिशत मात्रै सेवा शुल्कमा कर्जा दिने योजना ल्याएको बैंकले जनाएको छ ।
माछापुच्छ्रे बैंकले नाडा अटो शो विशेष अफरमा आधार दरमा १ प्रतिशत प्रिमियममा कर्जा योजना ल्याएको छ । ईभीमा ७० प्रतिशत र इन्धनबाट चल्ने गाडीमा ५० प्रतिशतसम्म कर्जा दिने बैंकले जनाएको छ । सेवा शुल्कमा भने ०.२५ प्रतिशत छुट दिँदा ०.५ प्रतिशत मात्रै लाग्ने बैंकले उल्लेख गरेको छ ।
नाडा अटो शोमा विकास बैंकतर्फ महालक्ष्मी विकास बैंकले स्टल राखेको छ । बैंकले दुई वर्षसम्म ९.९९ प्रतिशत स्थिर ब्याजदरमा कर्जा दिने र त्यसपछि आधार दरमा १ प्रतिशत प्रिमियम कायम गर्ने बैंकले जनाएको छ । बैंकले ईभीमा ५ वर्ष र अन्यमा ७ वर्ष अवधिको कर्जा दिने भएको छ ।
सेवा शुल्क बढीमा १ प्रतिशत भए पनि सेवा शुल्क नेगोसिएबल रहेको बैंकले जनाएको छ । कमर्सियलमा गाडी खरिदमा भने धितो चाहिने बैंकले जनाएको छ ।
सरकारले मोटरसाइकल तथा गाडीमा तेस्रो पक्ष बीमा अनिवार्य गरेको छ भने पूर्णबीमा समेत पछिल्लो समय बढ्दै गएको छ । बीमाका लागि स्ट्यान्डर्ड दर नै हुने भएकाले इन्स्योरेन्स कम्पनीले सोही दरको फर्मुलामा गाडीको मूल्य वा क्षमताका आधारमा बीमा गर्छन् ।
नाडा आटो शोमा शिखर इन्स्योरेन्सको स्टल छ । इन्धनबाट चल्ने गाडीको तुलनामा ईभीको बीमाको प्रिमियम तुलनात्मक रूपमा कम हुने गरेको कम्पनीले जनाएको छ ।