१० साउन/अर्थ र व्यापार – ग्लोबल आइएमई बैंकको प्रमुख कार्यकारी अधिकृत (सिइओ) मा सुरेन्द्रराज रेग्मी नियुक्त भएका छन्। बैंकको बिहीबार बसेको सञ्चालक समितिको बैठकले वरिष्ठ नायव प्रमुख कार्यकारी अधिकृत रेग्मीलाई सीइओ बनाउने निर्णय गरेको हो। नवनियुक्त सिइओ रेग्मीले आगामी १ भदौबाट सीइओको पदभार सम्हाल्ने छन्।
बैंकले तीन वर्षअघि डेपुटी सिइओमा रेग्मीलाई नियुक्त गरेको थियो। त्यसअघि १३ वर्षसम्म रेग्मी बैंकमा विभिन्न विभागहरुमा रहेर काम गरेका थिए। रेग्मीले करियरको सुरुवात राष्ट्रिय वाणिज्य बैंकबाट गरेका हुन्। उनले क्षेत्रीय कार्यालय, पोखराको शाखा प्रबन्धक हुँदै विभिन्न विभागमा बसेर काम गरेका थिए।
त्यसपछि उनी छात्रवृत्तिमा बेलायतको युनिभर्सिटी अफ वेल्समा एमबीए गर्न गएका थिए। बेलायतबाट फर्किएर केन्द्रीय कार्यालयमा काम गरेका थिए।
त्यसपछि रेग्मी ग्लोबल आइएमई बैंकमा डेपुटी म्यानेजर पदबाट छिरेका थिए। उनले राष्ट्रिय वाणिज्य बैंकमा पनि २०४५ साल १ भदौदेखि काम गरेका थिए । बैंकका प्रमुख कार्यकारी अधिकृत रत्नराज बज्राचार्यले यहि साउनको अन्तिममा अवकास पाउँदै छन्। सोही भएर बैंकले रेग्मीलाई नयाँ सिइओ बनाउने निणर्य गरेको हो ।