१६ फागुन/अर्थ र व्यापार – ओभर भ्यालुएसन गरेर ऋण दिएको भन्दै प्रहरीले बहालवाला र पूर्व बैंकर सहित ११ जनालाई पक्राउ गरेपछि बसेको बैंकर्स संघको आकस्कि बैठकले ‘बैंकिङ नम्स बुझाइमा कमजोरी भएको निष्कर्ष निकालेको छ।
मंगलबार प्रहरीको केन्द्रीय अनुसन्धान ब्यूरो सिआईबीले तत्कालीन सेञ्चुरी कमर्सियल बैंकका प्रमुख कार्यकारी अधिकृतहरु तुलसीराम गौतम, मनोज न्यौपानेसहित १० जना बैंकरलाई समातेको थियो।
निक्षेपकर्ताको बचत रकम नै दुरुपयोग गरि सहकारी डुबाउने रवीन्द्र चौलागाईंको अनुसन्धान गरिरहेको सिआईबी ब्यूरोले उनको कम्पनीमा ऋण दिएको भन्दै बैंकरलाई समेत समातेको थियो ।
अहिले उनीहरुमाथि अनुसन्धान गर्न अदालतले सात दिनको समय दिएको छ। बैंकर पक्राउ परेपछि छाता संगठन संघले बुधबार बिहान आकस्मिक बैठक डाकेको थियो । सो बैठकमा २० वटै वाणिज्य बैंकका प्रमुख कार्यकारी अधिकृत ÷प्रतिनिधि सहभागी थिए । उनीहरुले सिआइबी ब्यूरोका अधिकृतसँग भेटेर बैंकिङ कसरी चल्छ भनेर बुझाउने निर्णय समेत गरेका छन्।
बैंकहरुले धितोबाहेक परियोजना, बिजनेस, नगद प्रवाह लगायत थुप्रै आधारहरु हेरेर राष्ट्र बैंकको नियमभित्र रही ऋण दिने गरेको बताउने गरेका छन्। बैंकर्स संघको सो बैठकमा प्रहरी र सरकारको आलोचना भएको थियो। बैठकमा उपस्थित बैंकरहरु आतंकित देखिएका थिए।
तपाईको प्रतिक्रिया