१६ पुस/अर्थ र व्यपार – नेपाल एसबिआई बैंकको ३०औं वार्षिक साधारणसभाले सेयरधनीका लागि १०.५५ प्रतिशत लाभांश पारित गरेको छ । बैंकको काठमाडौमा सम्पन्न सभामा चुक्ता पुँजीमा ३.७५ प्रतिशत बोनस सेयर र ६.८० प्रतिशत नगद लाभांश वितरण गर्ने प्रस्ताव पारित भएको हो।

भद्रकालीस्थित त्रिभुवन आर्मी अफिसर्स क्लबमा भएको सभाले बैंकको आर्थिक वर्ष २०७९/८० को सञ्चालक समितिको प्रतिवेदन, लेखापरीक्षकको प्रतिवेदनसहितको वार्षिक आर्थिक विवरण (असार मसान्त २०८० को वासलात, नाफानोक्सान हिसाब र उक्त अवधिको नगद प्रवाह विवरण लगायत वार्षिक आर्थिक विवरणसँग सम्बन्धित अनुसूचीहरुसमेत) पारित गरेको छ ।
साधारण सभाले बैंकको सहायक कम्पनी नेपाल एसबिआई मर्चेन्ट बैकिङको आव २०७९÷८० को एकीकृत वित्तीय विवरण समेत स्वीकृत गरेको छ। सभाले बैंकका सेयरधनीहरुलाई ३.७५ प्रतिशत बोनस सेयर र ६.८० प्रतिशत नगद लाभांश (बोनस सेयर तथा नगद लाभांशमा लाग्ने करसहित) गरी चुक्ता पुँजीमा जम्मा १०.५५ प्रतिशतका दरले लाभांश वितरण गर्ने प्रस्ताव पारित गरेको छ ।
सो साधारणसभाले आव २०८०/८१मा बैंकको लेखापरीक्षण गर्नका लागि मेशर्स पीकेएफ टीआर उपाध्या एण्ड कम्पनी, चार्टर्ड एकाउण्टेन्ट्सलाई लेखा परीक्षकमा नियुक्त गर्दै पारिश्रमिक निर्धारण गरेको छ । यसैगरी, सो सभाले बैंकको प्रबन्धपत्रको विभिन्न दफामा संशोधन गर्ने प्रस्ताव समेत पारित गरेको छ ।
सो सभाले बैंकका तर्फबाट अन्य उपयुक्त बैंक तथा वित्तीय संस्थाहरु गाभ्ने÷गाभिने वा प्राप्ति गर्न आवश्यक सहमति र सम्झौता गर्न÷गराउन अख्तियारी सञ्चालक समितिलाई प्रत्यायोजन गर्ने प्रस्ताव समेत पारित गरेको कम्पनी सचिव श्रीधर अधिकारीले जनाएका छन्।