३२ साउन/अर्थ र व्यापार – बैंकहरुले भदौका लागि नयाँ ब्याजदर सार्वजनिक गरेका छन् ।
अधिकांश बैंकको ब्याजदर साउनको तुलनामा केही बढेको छ भने कुनैको मात्र घटेको छ । केही बैंकले मात्र साउनको ब्याजदरलाई निरन्तरता दिएका छन् ।
केही बैंकले मुद्दति निक्षेपको ब्याजदर अघिल्लो महिनाको तुलनामा बढाएका छन् भने केही बैंकले घटाएका छन् ।
वाणिज्य बैंकहरुले लामो समयदेखिको भद्र सहमति अन्त्य गरेपछि साउनदेखि आफूखुसी ब्याजदर निर्धारण गर्दै आएका छन् । बैंकहरुले निक्षेपको ब्याजदर परिर्वतन गर्दा औसत १० प्रतिशत विन्दुले घटाउन वा बढाउन सक्ने व्यवस्था रहेको छ । सोही व्यवस्था अनुसार अहिले विभिन्न बैंकहरुले भदौकालागि नयाँ व्याजदर कायम गरेका हुन ।
वर्तमान अवस्थालाई मध्यनजर गर्दै वाणिज्य बैंकहरुले भदौ महिनाका लागि नयाँ ब्याजदर सार्वजनिक गरेका हुन् । बैंकहरुले प्रकाशित गरेको नयाँ ब्याजदरअनुसार ४ वटा बैंकको ब्याजदर घट्दा ४ वटा बैंकको ब्याजदर स्थिर रहेको छ ।
यसैगरी, १२ वटा बैंकले भने साउनको भन्दा भदौमा ब्याजदर बढाएका छन् । सबैभन्दा बढी ब्याजदर ग्लोबल आइएमई बैंक, कुमारी बैंक, सिटिजन बैंक, कृषि विकास बैंक, सानिमा बैंक, नेपाल बैंक र एनआईसी एशिया बैंक रहेका छन् । यी बैंकहरुले भदौ महिनामा मुद्दति निक्षेपमा व्यक्तिगत तर्फ अधिकतम १०.८९६ प्रतिशत ब्याजदर तोकेका छन् । संस्थागत तर्फ अधिकतममा ८.८९६ प्रतिशतका दरले नयाँ व्याजदर कायम गरेका छन ।

यसैगरी, लक्ष्मी सनराइज बैंकको मुद्दति निक्षेपमा १०.४, संस्थागत तर्फ ७.९९, नबिल बैंकको व्यक्तिगत मुद्दति निक्षेपमा १०.४९ र संस्थागततर्फ ८.४९, प्राइम बैंकको व्यक्तिगततर्फ १०.५ र संस्थागत तर्फ ८.५, एभरेष्ट बैंकको व्यक्तिगततर्फ १० र संस्थागततर्फ ८ प्रतिशत व्याजदर कायम भएको छ । त्यसैगरी, प्रभु बैंकको संस्थागततर्फ १० र व्यक्तिगततर्फ ८ प्रतिशत ब्याजदर रहेको छ ।

साउनको तुलनामा भदौमा एनएमबि बैंक, प्राइम कमर्सियल बैंक , स्ट्याण्डर्ड चार्टर्ड बैंक, एनआईसी एशिया बैंकले ब्याजदर घटाएका छन् । एनएमबि बैंकको मुद्दति निक्षेपमा व्यक्तिगततर्फ ९.९९ प्रतिशत र संस्थागततर्फ ७.९९ प्रतिशत , नेपाल एसबिआई बैंकको व्यक्तिगततर्फ ९.९९ प्रतिशत , संस्थागततर्फ ७.९९ प्रतिशत , नेपाल इन्भेष्टमेन्ट मेगा बैंकको व्यक्तिगततर्फ ९.९९ र संस्थागत तर्फ ७.९९ प्रतिशत व्याजदर रहेको छ ।

यस्तै, हिमालयन बैंकको व्यक्तिगततर्फ ९.९९ प्रतिशत , संस्थागततर्फ ७.९९ प्रतिशत , सिद्धार्थ बैंकको व्यक्तिगततर्फ ९.९९ प्रतिशत र संस्थागत तर्फ ७.९९ प्रतिशत , माछापुच्छ्रे बैंकको व्यक्तिगततर्फ ९.९९ प्रतिशत र संस्थागततर्फ ७.४९ प्रतिशत व्याजदर तोकिएको छ।
त्यसैगरी, राष्ट्रिय वाणिज्य बैंकको व्यक्तिगततर्फ ९.९९ र संस्थागततर्फ ७.९९ तथा स्टयान्डर्ड चार्टर्ड बैंकको ब्याजदर व्यक्तिगततर्फ ८.९२ र संस्थागततर्फ ६.९२ प्रतिशत रहेको छ ।