२६ साउन/अर्थ र व्यापार – बैंकको जागिर सेवा सुविधाका हिसाबले आकर्षक मानिन्छ । त्यसैले पनि बैंकको जागिर खाने या बैंकर बन्ने चाहना धेरैमा हुन्छ । मेहनतका हिसाबले बैंकको जागिर सजिलो छैन ।
बैंकहरुले दैनिक ८–१० घण्टा काममा लगाउँछन् र त्यसबापत आकर्षक पारिश्रमिक पनि भुक्तानी गर्छन् । त्यसैले पनि मेहनत अनुसार पारिश्रमिक प्राप्त हुने भएकाले बैंकको जागिर अधिकांशको रोजाइमा पर्छ ।
गत आर्थिक वर्षमा बैंकहरुले कर्मचारीको सेवा सुविधामा ठूलो रकम खर्च गरेका छन् । सबैभन्दा धेरै एनआईसी एसिया बैंकले गत वर्ष कर्मचारीको पारिश्रमिकमा ४ अर्ब ५३ करोड खर्च गरेको छ ।
यो रकम अघिल्लो वर्षको भन्दा ११.१ प्रतिशत धेरै हो । अघिल्लो वर्ष बैंकले कर्मचारीको पारिश्रमिकमा ४ अर्ब ८ करोड खर्च गरेको थियो । नबिल बैंकले भने कर्मचारीको सेवा सुविधा गत वर्ष ७६.४ प्रतिशतले बढाएको छ । अघिल्लो वर्ष २ अर्ब २३ करोड खर्च गरेको बैंकले गत वर्ष ३ अर्ब ९४ करोड खर्च गरेको हो ।
त्यस्तै नेपाल इन्भेष्टमेन्ट मेगा बैंक बैंकले पनि कर्मचारीको सेवा सुविधामा ७६.१ प्रतिशतले वृद्धि गरेको छ । बैंकले अघिल्लो वर्षको १ अर्ब ४९ करोडबाट बढाएर २ अर्ब ६३ करोड रुपैयाँ पु¥याएको हो ।

कर्मचारीमा सबैभन्दा धेरै खर्च गर्ने अर्को बैंक सरकारी राष्ट्रिय वाणिज्य बैंक हो । यो बैंकले अघिल्लो वर्ष २ अर्ब ७७ करोड खर्च गरेकोमा गत वर्ष ३१.३ प्रतिशतले बढाएर ३ अर्ब ६४ करोड रुपैयाँ पु¥याएको छ ।
सरकारी स्वामित्वको अर्को वित्तीय संस्था नेपाल बैंकले पनि ५९.२ प्रतिशतले बढाएको छ । बैंकले अघिल्लो वर्ष २ अर्ब १६ करोड खर्च गरेकोमा गत वर्ष ३ अर्ब ४४ करोड खर्चिएको हो ।
यसैगरी, ग्लोबल आइएमई बैंकले गत वर्षको भन्दा २२.१ प्रतिशतले बढाएर २ अर्ब ७९ करोडबाट ३ अर्ब ४१ करोड पु¥याएको छ भने प्रभु बैंकले ३१.४ प्रतिशतले बढाएर २ अर्ब ५१ करोडबाट ३ अर्ब ३० करोड पु¥याएको छ ।
बैंकहरुले जारी गरेको गत वर्षको अपरिष्कृत वित्तीय विवरणअनुसार कृषि विकास बैंकले कर्मचारीको सेवा सुविधामा गरेको खर्च भने १३.३ प्रतिशतले घटेको छ । अघिल्लो वर्ष ३ अर्ब ६० करोड खर्च गरेको बैंकले गत वर्ष ३ अर्ब १२ करोडले पु¥याएको हो ।
सिद्धार्थ बैंकले ५.९ प्रतिशतले बढाएर २ अर्ब ३९ करोडबाट २ अर्ब ५४ करोड पु¥याएको छ भने कुमारी बैंकले १७.१ प्रतिशतले बढाएर २ अर्ब ८ करोडबाट २ अर्ब ४३ करोड बनाएको छ । त्यस्तै एनएमबी बैंकले ७.६ प्रतिशतले बढाएर २ अर्ब २१ करोडबाट २ अर्ब ३८ करोड पु¥याउँदा हिमालयन बैंकले ४३ प्रतिशतले बढाएर १ अर्ब ३९ करोडबाट २ अर्ब पु¥याएको छ ।
बैंकहरुको असारसम्मको अपरिष्कृत वित्तीय विवरणअनुसार माछापुच्छ्रे बैंकले १२.३ प्रतिशतले बढाएर १ अर्ब ७६ करोडबाट १ अर्ब ९७ करोड बनाएको छ भने एभरेस्ट बैंकले १.६ प्रतिशतले बढाएर १ अर्ब ८० करोडबाट १ अर्ब ८३ करोड पु¥याएको छ ।
यसैगरी, एसबिआई बैंकले ७.९ प्रतिशतले बढाएर १ अर्ब ६६ करोडबाट १ अर्ब ८० करोड बनाउँदा सिटिजन्स बैंकले १ अर्ब ५८ करोडबाट ७.२ प्रतिशतले बढाएर १ अर्ब ७० करोड पु¥याएको छ । लक्ष्मी सनराइज बैंकले १०.६ प्रतिशतले १ अर्ब ४६ करोडबाट १ अर्ब ६१ करोड बनाएको छ भने सानिमा बैंकले १२.८ प्रतिशत बढाएर १ अर्ब ३४ करोडबाट १ अर्ब ५१ करोड रुपैयाँ पु¥याएको छ ।
प्राइम कमर्सियल बैंकले गत वर्ष कर्मचारीको सेवा सुविधामा ८.५ प्रतिशतको वृद्धि गरेको छ । प्राइमले अघिल्लो वर्ष १ अर्ब ३९ करोड खर्च गरेकोमा गत वर्ष १ अर्ब ५१ करोड खर्च गरेको हो । स्ट्यान्डर्ड चार्टर्ड बैंकले १ अर्ब ४ करोडबाट १५ प्रतिशत बढाएर १ अर्ब २० करोड पु¥याएको छ । बैंकहरुले यसबाहेक कर्मचारीलाई क्षमताअनुसार बोनस उपलब्ध गराउने गरेका छन् ।