१७ बैशाख/अर्थ र व्यापार – निजी क्षेत्रका बैंकहरुबीच आपसी मर्जरको लहरसँगै अहिले सरकारी दुईवटा बैंकहरु पनि मर्जरका लागि छलफल अघि बढेको छ ।
राष्ट्रिय वाणिज्य बैंक र नेपाल बैंकको मर्जरका लागि कार्यदल गठन भएको छ । यी दुई बैंक मर्जरको सम्वन्धमा अर्थमन्त्रालयले विस्तृत अध्ययनका लागि कार्यदल गठन गरेको हो ।

मर्जर सम्वन्धी अध्ययनका विश्लेषण गर्न अर्थमन्त्रालयका वित्तीय क्षेत्र व्यववस्थापन महाशाखाका प्रमुख भुपाल बरालको संयोजकत्वमा कार्यदल बनाएको बुझिएको छ । केही समयदेखि सरकारी दुई बैंकबीच एक आपसमा गाभ्ने भनेर आन्तरिक रुपमा व्यापक छलफल हुँदै आएको थियो । नियामक निकाय नेपाल राष्ट्र बैंक हुँदै अर्थमन्त्रालयमा छलफल भईरहेको थियो ।

यस्तो तयारीको हल्लासँगै नेपाल राष्ट्र बैंकका गभर्नर महाप्रसाद अधिकारीले समेत सार्वजनिक कार्यक्रममा सरकारी बैंकहरु पनि मर्जरमा जानुपर्ने अभिव्यक्ति दिँदै आएका छन् । गत १० माघमा राष्ट्रिष्य वाणिज्य बैंकको वार्षिकोत्सवको कार्यक्रममै गभर्नर अधिकारीले पछिल्लो समयमा निजी क्षेत्रका बैंकहरुको मर्जरको लहर चलिरहेको र बैंकहरुको व्यावसायिक आकार बढीरहेको भन्दै सरकारी बैंकहरुलाई पनि मर्जरमा जान सुझाव दिएका थिए ।
उनले भनेका थिए, ‘आवश्यक परेमा तीनवटा सरकारी बैंक मिलेर मर्जको लागि एक आपसमा कुरा गर्न सक्नेछन् ।’ सार्वजनिक कार्यक्रममा नै गर्भनर अधिकारीले सरकारी बैंकहरुले पनि मर्जरको फाइदा र आवश्यकता बुझ्न आवश्यक रहेको औल्याएका थिए । मर्जरपछि बैंकहरुले प्रतिस्पर्धात्मक रुपमा व्यवसाय वृद्धि र गुणस्तरीय सेवा प्रवाह हुने उनको भनाई थियो ।
त्यसैले हाल देसको आर्थिक अवस्थालाई दृष्टिगत गर्दै नेपाल र बाणिज्य बैंकले एक आपसमा मर्ज हुने गरि छलफल अघि बढाएका हुन् । यो छलफल अब छिटै टुंगोमा पुग्ने यि दुई बैंकभित्रका कर्मचारीहरुको भनाई छ ।