२० भदौ/अर्थ र व्यापार – दसैं तिहार लगायतका चाडपर्व नजिकिएसँगै रेमिट्यान्स बढेपछि बैंकहरुको निक्षेपमा सुधार देखिएको छ ।
चालु आर्थिक वर्ष २०७९/०८० सुरु भएयता बैंकिङ प्रणालीबाट निरन्तर निक्षेप बाहिरिए पनि भदौको तेस्रो सातामा आएर भने सुधार भएको छ ।
दसैँ, तिहार, छठपर्व लगायतका चाडपर्वहरु नजिएसँगै रेमिट्यान्स आउने क्रम बढ्दा बैंकहरुको निक्षेपमा समेत सुधार आएको हो ।
भदौको तेस्रो साता सोमबारसम्ममा बैंकिङ प्रणालीमा ११ अर्ब ३० करोड रुपैयाँ निक्षेप थपिएको छ । यस अवधिमा बैंकहरुले एक अर्ब ६७ करोड रुपैयाँ कर्जा परिचालन गरेका छन ।
१७ भदौसम्म वाणिज्य बैंकहरुमा ४४ खर्ब ३७ अर्ब रुपैयाँ निक्षेप रहेको छ भने यस अवधिसम्म ४१ खर्ब ८१ अर्ब रुपैयाँ कर्जा लगानी गरेका छन ।
साउनको अन्त्यसम्म बैंकहरुमा ४४ खर्ब ३३ अर्ब रुपैयाँ निक्षेप रहेको थियो । सो अवधिसम्म बैंकहरुले ४१ खर्ब ७७ अर्ब रुपैयाँ कर्जा प्रवाह गरेका थिए ।
नेपालीहरुको ठूला पर्व तीज, दसैं, तिहार र छठपर्व लगायतका चाडपर्व नजिएकाले रेमिट्यान्स आप्रवाहमा सुधार आएसँगै अहिले बैंकहरुमा निक्षेप थपिएको हो ।
नेपाल राष्ट्र बैंकका अनुसार अहिले समग्र वित्तीय प्रणालीमा ५० खर्ब ३५ अर्ब रुपैयाँ निक्षेप रहेको छ । हाल बैंकहरुले ४७ खर्ब १० अर्ब रुपैयाँ कर्जा परिचालन गरेका छन ।