१० मंसिर / अर्थ र व्यापार – सिभिल बैंकले विभिन्न कार्यक्रमको आयोजनासँगै नयाँ सेवाहरुको सुरुवात गर्दै शुक्रबार आफ्नो एघारौं वार्षिकोत्सव मनाएको छ । बैंक संचालक समितिका अध्यक्ष प्रतापजंग पाण्डको प्रमुख अतिथ्य तथा प्रमुख कार्यकारी अधिकृत सुनिल कुमार पोखरेलको सभापतित्वमा बैंकको प्रधान कार्यालय काठमाडौमा विभिन्न सेवाहरुको थालनी गर्दै सिभिल बैंकले आफ्नो एघारौं वार्षिकोत्सव मनाएको हो ।
वार्षिकोत्सवकै अवसरमा बैंकले प्रधान कार्यालय लगायत देशैभरिका शाखाहरुमा समेत बिभिन्न कार्यक्रमहरु आयोजना गरेको जनाएको छ । बैंकको प्रधान कार्यालयमा प्रायोरीटि बैंकिग सेवाको उद्घाटन बैंकका संचालक समितिका अध्यक्ष प्रतापजंग पाण्डेले गरेका हुन ।  यसैगरि, कल सेन्टर सेवा र मिस्ड कल बैंकिंग ‘एक घण्टी झ्याप्प पेमेन्ट’ सेवाको शुभारम्भ बैंक संचालक समितिका सदस्य प्रकाश तायलले गरेका हुन् ।
यसैगरि, सामाजिक उत्र्तरदायित्व बहनका कार्यक्रम अन्तरगत सो बैंकले देशभर छरिएका बैंकका मुख्य शाखा सहित ३८ स्थानमा ५९ शाखाहरुको सहभागितामा रक्तदान कार्यक्रम आयोजना गरिएको जनाएको छ । त्यसैगरि, बैंकका ५६ स्थानका ५६ वटै शाखाहरुमा विपन्न तथा जेहन्दार छात्रालाई छात्रवृति कार्यक्रम अन्तरगत बैंकले सरकारी विद्यालयमा कक्षा ६ देखि कक्षा १० मा अध्ययनरत गरीव तथा जेहन्दार छात्रालाई छात्रवृति स्वरुप जनही ५ हजार रुपैंयाकादरले प्रदान गरिने कार्यक्रम रहेको सो बैंकले जनाएको छ ।
वार्षिकोत्सवकै अवसरमा प्रायोरीटि बैंकिग सेवाको सुरुवातसँगै कल सेन्टर सेवाको सुरुवात गरेको बैंकले मिस्ड कल बैंकिंग ‘एक घण्टी झ्याप्प पेमेन्ट ’ सेवाको सुरुवात गरेको छ । साथै सिभिल बैंक ईन्टरनेशनल भर्चुअल डलर कार्ड सेवाको सुरुवात गरिएको छ भने सिभिल भर्चुयल एसिस्टेन्ट ‘सिभा’को पनि सुरुवात गरिएको छ । यसैगरि,बैंकमा पाँच वर्षभन्दा लामो समयदेखिसेवा प्रदान गरेका बैंकका कर्मचारीहरुलाई पनि बैंकले अभिनन्दन गरेको छ ।
सिभिल बैंकले एघारौं वर्षपार गर्दा सम्म करिव ९२ अर्व निक्षेप संकलन गरि करिव ८८ अर्व रुपैयाँ ऋण लगानी गरेको जनाएको छ । यसैगरि, बैंकले चालु आर्थिक वर्षको प्रथम त्रैमास सम्ममा २९ करोड १८ लाख खुद मुनाफा कमाउन सफल भएको छ । बैंकले हाल ११५ शाखा तथा १० वटा एक्सटेन्सन काउण्टर मार्फत सेवा संचालन गर्दै आएको सो बैंकले जनाएको छ ।