१६ पुस/ अर्थ र व्यापार - डेटा लिकमा पटकपटक आलोचना झेलिरहेको फेसबुकका संस्थापक सीईओ मार्क जुकरवर्गले फेसबुकमा देखिइरहेको समस्या समाधानका लागि अझै एक वर्षभन्दा बढी समय लाग्नसक्ने बताएका छन् । उनले भने चुनावमा सोसल मिडियाको माध्यमबाट हस्तक्षेप जस्तो समस्या त कहिल्यै पनि पूर्ण रुपमा समाप्त हुनै सक्दैन ।

जुकरबर्गले एउटा ब्लग पोष्टमा उक्त कुरा बताएका हुन् । यूरोपदेखि अमेरिकासम्म पटक–पटक डेटा लिकको खबर सार्वजनिक भएपछि जुकरबर्गले कयौँ पटक यस मुद्दामा माफी पनि मागेका थिए । उनले फेसबुक अब पूरै बदलिएको कम्पनी भएको दाबी गरेका छन् । उनले भने, फेसबुकका समस्यालाई लिएर कम्पनी अति सक्रिय (प्रोएक्टिभ) दृष्टिकोण राख्नेछ । यसका लागि हामीले आफ्नो डीएनए मौलिक रुपमा बदलिदिएका छौं ।

उनले कम्पनीद्धारा उठाइएको केही कदमको पनि जानकारी दिए । आतङ्कवादसँग जोडिएका ९९ प्रतिशत कन्टेन्ट कसैले उजुरी गर्नभन्दा पहिले नै फेसबुक आफैँले हटाइदिन्छ । गलत सुचना, घृणा फैलाउने काम, चुनावमा हस्तक्षेप र गलत सूचना फैलाउनका लागि सबैभन्दा ठूलो सोसल मिडिया प्लेटफर्म फेसबुकको दुरुपयोग गरिएको कुरा जुकरबर्गले स्वीकार गरेका छन् ।