२ माघ/अर्थ र व्यापार– अनलाइन फुड डेलिभरी प्ल्याटफर्म फुडमाण्डूले यो वर्षको अनलाइन फुड फेस्टिभल आजदेखि सुरु हुने भएको छ ।

फुडमाण्डूले अनलाइन प्ल्याटफर्म मार्फतसन् २०१७ देखि फुड फेस्टिभलको नियमितरुपमा आयोजना गर्दै आएको छ ।

पहिलो पटक पोखरामासमेत आयोजना हुने फेस्टिभलमा यसपटक काठमाडौंका ३० र पोखराका १४ वटा रेस्टुरेन्टहरु सहभागी हुनेछन् ।

कम्पनीले उत्कृष्ट खानेकुराका साथै आफ्ना ग्राहकहरुलाई मनोरन्जनसमेत प्रदान गर्नका लागि आयोजना गरिएको जानकारी दिएको छ ।

सात दिनसम्म सञ्चालन हुने अनलाइन फुड फेस्टिभलमा छुटमा खानेकुरा उपलब्ध हुने, अग्मेन्टेड रियालिटी गेम, पहिलो पटक लाइभ म्यूजिकको फिचर्स पनि थपेको छ ।

कम्पनीका मार्केटिङ एण्ड सेल्स म्यानेजर श्याम मालीले अनलाइन फुड फेस्टिभलमा आफ्ना ग्राहकहरुलाई  फुड अर्डर बिक्री गर्ने मात्र नभएर मनोरञ्जन लागि लाइभ म्यूजिक परफरमेन्स समेत हुने बताए ।
लाइभ म्यूजिक इभेन्टमा ज्योभन भुजु, संजय महत, उज्वलमान श्रेष्ठ, प्रसन्ना अधिकारीलगायतका कलाकारहरुले आफ्नो विशेष प्रस्तुती दिने छन् ।

कम्पनीले वार्षिकरुपमा आयोजना गर्ने अनलाइन फुड फेस्टिभलमा  मोबाइल एप्समार्फत् अर्डर गर्ने ग्राहकहरुलाई आकर्षक क्यासब्याकका साथसाथै अधिकतम ५०० सय रुपैयाँ बराबरको २५ प्रतिशतसम्मको छुट अफर दिनेछ । क्यूआरमार्फत् हुने भुक्तानीमा अतिरिक्त छुट हुने छ ।

अनलाइन फुड फेस्टिभलमा कम्पनीले १  रुपैयाँमा नै ग्राहकहरुलाई खानेकुरा उपलब्ध गराउने छ ।  गेमहरु खेलेर थप डिस्काउन्ट समेत प्राप्त सकिने छ ।

फ्लाश सेलमा दिनको तीन पटक एक एक घण्टाको अफर आयोजना हुने छ । मिस्ट्री ब्यागमा  न्यूनतम मूल्यमा सरप्राइज फुड प्राप्त गर्न सकिने कम्पनीले जानकारी दिएको छ ।

फेस्टिभलमा सहभागी हुनका लागि फुडमान्डूको मोबाइल एप्लीकेशन मार्फत त्यसमा रहेको फेस्टिभल सेक्सनमा क्लिक गरेपछि एनिमेशन प्ले गरेर आफूले चाहेको खानेकुरा अर्डर गर्न तथा गेमहरु खेल्न सकिने छ ।