१ असार / अर्थ र व्यापार - वर्षौदेखिको लोडसेडिङ तथा ल्यापटपको दबदबाले बिक्नै छाडेको डेस्कटप कम्प्युटरको कारोबारमा पछिल्लो समय उल्लेख्य वृद्धि भएको छ । पछिल्लो समय राजधानी लगायतका स्थानमा नियमित बिजुली आपूर्ति हुन लागेसँगै डेस्कटपको व्यापारमा पनि उत्साहजनक वृद्धि भएको छ । 

विशेषतः कार्यालय प्रायोजन, ठूला प्रकृतिका कार्य, किफायती र भरपर्दो हुने भन्दै केही वर्षअघिसम्म पहिलो रोजाइमा ल्यापटप भन्दा डेस्कटप नै पथ्र्यो तर चार्ज गरेर चलाउन नमिल्ने प्रविधि भएकै कारण घण्टौ लामो लोडसेडिङमा डेस्कटपको उचित विकल्प ल्यापटपको प्रयोग बढ्यो ।

विगत वर्षहरुमा नगन्य हुने डेस्कटपको विक्री पछिल्लो केही महिनाबाट ह्वातै बढेको छ । पहिले मुस्किलले महिनामा १० वटा विक्री हुने गरेको डेस्कटप  आजभोली दिनको ५ वटासम्म विक्री हुने गरेको छ । तर डेस्कटपको विक्री बढे पनि यसलाई ल्यापटपले विस्थापित गर्ने क्रम भने नरोकिएको छ।

१५ हजारदेखि २ लाखसम्म मूल्यका कम्प्युटर र ल्यापटपमा ४० देखि ७० हजार सम्मको मध्यम रेन्जमा धेरै विक्री हुने गर्दछ । नेपाली बजारमा डेल, एसस, एसर, एमएसआई लगायत ब्राण्डका डेस्कटप तथा ल्यापटपहरु लोकप्रिय छन्। सिंगापुर, अमेरिका, थाइल्याण्ड लगायतका देशबाट नेपालमा यी सामानहरुको आयात हुने गर्छ ।