६ मंसिर  / अर्थ र व्यापार - दाङको फोनसेवा १२ घण्टादेखि ठप्प रहेको छ । गएरातिदेखि दाङको टेलिफोन सेवा ठप्प रहेको हो । नमस्तेको मोबाईल र ल्याण्डलाईन फोन समेत बिग्रिएपछि दाङ जिल्ला सञ्चारविहीन बन्न पुगेको छ । त्यसैले जिल्लाको इमेल इन्टरनेट सेवा समेत प्रभावित बनेको छ । घोराही नजिकैको कटुवा खोलामा जमिनमुनी विच्छाइएको अप्टिकल फाईबर चुडिएको हुँदा गएराति सवा ११ बजेदेखि दाङको ल्याण्डलाईन फोन र नेपाल टेलिकमद्वारा सञ्चालिन सबै प्रकारको सेवा अवरुद्ध भएको दूरसञ्चार कार्यालय राप्ती तुलसीपुरका प्रमुख बलराम जोशीले जानकारी दिए । तर, जिल्लामा एनसीएलको फोन भने सूचारु रहेको छ ।

तुलसीपुरको कार्यालयदेखि २७ किलोमिटर पूर्व कटुवाखोलामा अप्टिकल फाईबर चुडिएपछि फोन सेवा अवरुद्ध भएको र मर्मतका लागि प्राविधिकहरू बिहान ४ बजे नै खटाईसकेको कार्यालय प्रमुख जोशीले बताए । अप्टिकल फाईबर कसरी चुडिन पुग्यो? भन्ने बारेमा भने एकीनका साथ भन्न नसकिने उनले बताए । कटुवा खोलामा पुल निर्माण हुँदै आएकोले खन्ने क्रममा स्काभेटरले चुडाएको हुन सक्ने वा बुधबार जिल्ला बन्द आह्वान गरेको बिप्लव समूहले उक्त कार्य गरेको हुन सक्ने आशंका गरिएको छ । मर्मत कार्य जारी रहेकोले अबको केही घन्टामै सेवा पुनस्सञ्चालन हुने उनले बताए ।