२१ जेठ / अर्थ र व्यापार-सोमबारदेखि एप्पलको सबैभन्दा ठूलो समारोहमध्येको एक वल्र्डवाइड डेभलपर्स कन्फ्रेन्स सुरु हुँदैछ । एप्पलले विगतका यस्ता सम्मेलनमा आफ्नो अपरेटिङ सिस्टमको नयाँ संस्करण सार्वजनिक गर्ने गरेको थियो । तर यो वर्ष चाहीँ एप्पलले सफ्टवेयर मात्र नभै हार्डवेयरको मामिलामा पनि ठूलो घोषणा गर्नसक्ने छ ।

जुन ५ देखि ९ सम्म चल्ने यो वर्षको सम्मेलनमा एप्पलले आइप्याड प्रो, म्याकबुक तथा सिरी स्मार्ट स्पिकर जस्ता नयाँ प्रडक्टहरु लञ्च गर्ने अनुमान पनि गरिएको छ । यस पटक एप्पलले मोबाइल अपरेटिङ सिस्टम आइओएसको नयाँ भर्सन आइओएस ११ सार्वजनिक गर्ने तयारी गरिरहेको छ । यसमा इन्टरफेस नयाँ हुनसक्नेछ भने ग्रुप फेसटाइम फङ्क्सनालिटी पनि थप हुनेछ । साथै यो सँगै ३२ बिट एप्सको पनि अन्त्य हुनेछ ।

 एप्पलले सोमबार १०.५ इन्चको आइप्याड प्रो सार्वजनिक गर्नेछ । यस इभेन्टमा आइप्याड प्रो लञ्च हुने सम्भावना ७० प्रतिशत रहेको छ । एप्पलले नयाँ मोडल लञ्च गर्नेछ वा अक्टोबर २०१६ मा लञ्च गरेको म्याकबुक प्रो मोडलमा टचबार आइडी वा टचआइडीको फिचर मात्र थप गरेर ल्याउनेछ ।

अमेजनको एको तथा गुगलको होमलाई टक्कर दिँदै एप्पलले पनि सिरीयुक्त स्पिकर ल्याउनेछ । यसमा अनुहार पहिचान गर्नसक्ने फिचर हुनेछ । यो आइओएसमा चल्ने बताइएको छ । एप्पलले यो पटक म्याजिक किबोर्ड लञ्च गर्नसक्ने दाबी कतिपयले गरेका छन् । यस किबोर्डमा टच आइडी तथा टचबार हुनसक्नेछ ।