२९ चैत/अर्थ र व्यापार– आगामी ७ वैशाखबाट काठमाडौंको भृकुटीमण्डपमा ६ दिने आईएमई पे क्यान इन्फोटेक २०२२ आयोजना हुने भएको छ ।आगामी १२ बैशाखसम्म सञ्चालन हुने इन एसोसियसन विथ एससिटी स्मार्ट क्यूआरको तयारी अन्तिम चरणमा पुगेको क्यान महासंघले जनाएको छ ।

दुईपटक स्थगित भएको एवं विगतमा सबै प्रदेशमा आयोजना हुने प्रदर्शनी यसपटक काठमाडौंमा मात्र हुने भएको बताइएको छ ।
२७औं क्यान इन्फोटेकको शीर्ष प्रायोजन आईएमई पेले गरेको छ भने सहप्रायोजक एससिटी स्मार्ट क्यूआर युनियन पे रहेको छ । विगतका वर्षमा साधारणतया पुस÷माघ÷फागुन महिनामा आयोजना भइरहेको क्यान इन्फोटेक, यो वर्ष कोभिड–१९ का कारण विगत वर्षका इन्फोटेकभन्दा करिब तीन महिना ढिला गरी आयोजना हुँदै छ ।
यसको आयोजनाले कोभिड–१९ का कारण प्रभावित भएका तथा नभएका सम्पूर्ण सूचना तथा सञ्चार प्रविधि व्यवसायी तथा सम्बन्धित पक्षलाई राहत तथा सहयोग पुग्ने अपेक्षा क्यान महासंघले लिएको छ ।
इन्फोटकको प्लाटिनम प्रायोजकमा वल्र्डलिंक कम्युनिकेसन, डायमन्ड प्रायोजकमा डिसहोम फाइवरनेट, गोल्ड प्रायोजकमा जेनेरेसन नेक्स्ट र नेपाल क्लियरिङ हाउस लिमिटेड, सिल्भर प्रायोजकमा नमस्ते पे, डिजिकम, एस पावर, ब्रोडवे इन्फोसिस, हुवावे टेक्नोलोजिज र टेकमिन्ट रहेका छन् ।
यसैगरी, इन्नोभेसन पार्टनर सफ्टवेरिका कलेज, एकेडेमिक पार्टनरको रूपमा सनवे कलेज, लजिस्टिक पार्टनरमा एक्सल्याब, इकमर्स पार्टनर सोचेको डटकम र डिजिटल डिस्प्ले पार्टनरको रूपमा अल्ट्रा एलईडी रहेका छन् ।
इन्फोटेकलाई नेपाल सरकार सञ्चार तथा सूचना प्रविधि मन्त्रालय, सूचना प्रविधि विभाग, नेपाल उद्योग वाणिज्य महासंघ, नेपाल दूरसञ्चार प्राधिकरण, नेपाल बैंक लिमिटेड, नेपाल विज्ञान तथा प्रविधि प्रज्ञा–प्रतिष्ठान, नेपाल चेम्बर अफ कमर्स, नेपाल उद्योग परिसंघ, सुविसु केवलनेट, भायानेट, रोबोटिक्स एसोसियसन अफ नेपाललगायत अन्तर्राष्ट्रिय संस्था विट्साको प्रत्यक्ष/अप्रत्यक्ष रूपमा सहयोग एवं समर्थन रहेको बताइएको छ ।
क्यान इन्फोटेक २०२२ मा विभिन्न खण्ड रहने छन्, जसमा ब्रान्डिङ, फिन्टेक, स्टार्टअप र इन्नोभेसन, आईसीटी एक्सेसरिज तथा प्रडक्ट लन्चिङ र ई–गभर्नेन्स मुख्य हुने बताइएको छ । ब्रान्डिङ खण्डमा सूचना प्रविधि प्रर्दशनीमा क्यान महासंघका सदस्य संस्थाका साथै विभिन्न राष्ट्रिय र अन्तर्राष्ट्रिय सूचना तथा सञ्चार प्रविधिसम्बन्धी कम्पनी एवं उत्पादनको सहभागिता रहनेछ ।
फिन्टेक खण्डमा नेपालमा रहेका बैंक तथा वित्तीय एवं सम्बन्धित संस्थाको सुचना तथा सञ्चार प्रविधिको प्रयोगले प्रवाह हुने सेवा तथा यससम्बन्धी उत्पादन रहनेछन् । स्टार्टअप र इनोभेसन खण्डमा २६ वटा स्टार्टअप र इनोभेसनसँग सम्बन्धित व्यक्ति वा संस्थाले आफ्ना नयाँ प्रडक्ट र आइडियाको प्रदर्शनी गर्ने छन् ।
इनोभेसनका निम्ति क्यान महासंघ नेपाल विज्ञान तथा प्रविधि प्रज्ञा–प्रतिष्ठानसँग सहकार्य गरेको छ भने स्टार्टअपका निम्ति क्यान महासंघले सार्वजनिक सूचना निकालेर सम्बन्धित व्यक्ति वा संस्थालाई सहभागी हुन आह्वान गरेर प्राप्त आवेदनबाट छनोट गरिसकिएको छ ।
आईसीटी एक्सेसरिज तथा प्रडक्ट लन्चिङ खण्डमा व्यवसायीले व्यापार विस्तारका साथै नयाँ नयाँ प्रविधिको प्रदर्शनी गर्ने थलोका रूपमा उपयोग गर्न सक्नेछन् भने अवलोकनकर्ताले एकै थलोमा सूचना तथा सञ्चार प्रविधिका नौला र भविष्यका निम्ति प्रविधि र उपकरणको अवलोकन तथा खरिद गर्न पाउनेछन् ।
यसबाहेक क्यान इन्फोटेक २०२२ मा रोबोटिक्स, इमर्जिङ टेक्नोलोजी, वाइफाइ तथा इन्टरनेट लगायतका कुरा रहनुकासाथै व्यवसायीले सफ्टवेयर, नेटवर्किङ र क्लाउड सोलुसन, इलेक्ट्रिकल तथा इलेक्ट्रोनिक्स, सेक्युरिटी सोलुसन, सोलार पावर सिस्टम, इन्भर्टर, यूपीएस, ल्यापटप तथा डेस्कटप कम्प्युटर, प्रिन्टर, पावर सिस्टम सोलुसन, कम्प्युटर एक्सेसरिज, एन्टिभाइरस सफ्टवेयर, बैंकिङ सोलुसन, सीसीटिभी र हार्ड डिस्कजस्ता उत्पादन प्रदर्शनी तथा बिक्रीमा राख्नेछन् ।