७ साउन/अर्थ र व्यापार– नेपाल आयल निगमले नेपाल क्लियरिङ हाउस लिमिटेड (एनसीएचएल) को प्रणाली मार्फत भुक्तानी संकलन गर्ने ’एसएपी’ प्रणालीको सुरुवात गरेको छ ।

निगमका डिलर तथा पार्टनरहरुले अब कनेक्टआइपीएस (वेब, मोबाइल एप तथा गेटवे), कर्पोरेट्पे तथा बैंक र वित्तीय संस्थाहरुको शाखामार्फत निगमलाई अनलाइन भुक्तानी गर्न सक्नेछन् ।

निगमले एनसीएचएलको प्रणाली मार्फत भुक्तानी संकलन गर्न थालेको चार दिनमा नै तीन अर्ब ९७ करोड रुपैयाँ बराबरको भुक्तानी संकलन भएको जनाएको छ । एसएपी प्रणालीलाई नेपालमा सञ्चालन गर्ने निगम पहिलो सरकारी निकाय हो ।

एनसीएचएलले शाखाबाट १० लाख रुपैयाँसम्मको रियल टाइम अन्तर बैंक भुक्तानी गर्न सकिने, एउटै बैंकमा रियल टाइममा प्रति कारोबार एक करोड रुपैयाँसम्म तथा नन् रियल–टाइममा २० करोड रुपैयाँसम्म भुक्तानी गर्न सक्ने जनाएको छ । 

एनसीएचएलले कनेक्टआइपीएसमा हाल ५४ भन्दा बढी बैंक तथा वित्तीय संस्थामा फण्ड ट्रान्स्फर तथा अन्य विभिन्न भुक्तानीहरु गर्न सकिने बताइएको छ । 

त्यस्तैगरी, एनसीएचएल आइपीएसमा ६२ र कर्पोरेट पेमा ३० बैंक तथ वित्तीय संस्था आबद्ध रहेको एचसीएचएलले जनाएको छ ।