१२ असार / अर्थ र व्यापार - कारका लागि सुरक्षित एयरब्याग बनाउने जापानी कम्पनी टकाटाले आफू टाट उल्टिएको घोषणा जापान र अमेरिकामा गरेको छ । सन्सारकै सबैभन्दा ठूलो एयरब्याक उत्पादन गर्ने कम्पनीले आर्थिक अवस्था कमजोर भएपछि टाट उल्टिएको घोषणा गरेको हो । 

टकाटा कानुनी र आर्थिक कारणले टाट उल्टिएको हो । अमेरिकी अटो पार्टस् सप्लायर ’कि सेफ्टी सिस्टम’ ले टकाटाको सन्सारभरीको सम्पति तथा सञ्चालनका लागि एक अर्ब ५९ करोड डलर सहायतमा सम्झौता गर्न कुराकानी भने भइरहेको छ ।

पछिल्ला केही बर्षहरुमा टकाटाको एयर ब्यागको गुणस्तरमा निरन्तर प्रश्न उठिरहेको थियो । खराव उत्पादनका कारण १८० जना घाइते तथा १७ जनाको मृत्यु नै भएको थियो । यही कारण केही कम्पनीहरुले उसलाई सामान फिर्ता लैजान भनिरहेका थिए । यसो हुँदा उसले बजार बाट १० अर्ब डलरको सामान फिर्ता लैजानु पर्ने थियो ।

 टकाटामाथि अमेरिका र क्यानडाका अदालतहरुमा मुद्दा पनि चलिरहेको छ । सन् २००७ मा पहिलो पल्ट बजार पुगेको एयरब्याग फिर्ता गर्नु परेको थियो । त्यसयता अमेरिकाबाट मात्र ७ करोड वटा एयर ब्याग फिर्ता भएका छन् । १० करोडभन्दा वढि कारहरुमा  टकाटाका एयर ब्यागहरु गुणस्तरहिन भेटिएको छ । यसका लागि उसले अमेरिकालाई मात्रै पटक पटक क्षतिपुर्ति तिर्दै आएको थियो । टोकियो स्टक एक्सचेञ्जमा टकाटाका सेयर कारोबार पनि बन्द गरिएको छ ।