८पुस /अर्थ र व्यापार  - भारतले विद्युत आयात–निर्यातसम्बन्धि निर्देशिका संशोधन गर्दै छिमेकी देशबाट विद्युत खरीद गर्न सकिने व्यवस्था गरेको छ । यसअघि भारतीय कम्पनी वा भारत सरकारको ५१ प्रतिशत शेयर स्वामित्व भएको कम्पनीबाट मात्रै विद्युत खरिद गर्न सकिने व्यवस्था संशोधन गर्दै भारत सरकारले विद्युत आयातसम्बन्धि व्यवस्थालाई केही खुकुलो बनाइएको हो ।

नयाँ निर्देशिकाअनुसार छिमेकी देश, ती देशले तोकेका कम्पनी वा विद्युत व्यापारसम्बन्धि संस्थाबाट भारत सरकारले विद्युत खरिद गर्न सक्नेछ । दुई देशको आपसरी समझदारीबाट पनि विद्युत खरिद गर्न सकिने निर्देशिकामा उल्लेख गरिएको छ ।  यो निर्देशिकामा भारतीय प्रसारण लाइनमार्फत छिमेकी देशमा उत्पादित विद्युत अर्को देशमा व्यापार गर्न पाउने पनि उल्लेख गरिएको छ ।

नयाँ निर्देशिकामा भारतीय र उसका छिमेकी देशका संस्थाबीच सीधा सम्झौताबाट पनि विद्युत खरिद गर्न सकिने पनि उल्लेख गरिएको छ । नयाँ निर्देशिकाले भारत र उसका छिमेकीबीच सहज विद्युत आपूर्ति एवं कारोबारका लागि बाटो खुलेको छ ।
यस्तै भारतीय जेनेरेसन कम्पनीले विद्युत निर्यात गर्न सकिने पनि निर्देशिकामा उल्लेख गरिएको छ । द्विपक्षीय समझदारीमा विद्युत निर्यात गर्न भने भारत सरकारले कुनै निकायलाई तोक्न सक्ने निर्देशिकामा भनिएको छ ।  भारतले दुई वर्षअघि ल्याएको निर्देशिकाले विद्युत व्यापार अवरुद्ध बनाएको भन्दै जलविद्युत क्षेत्रका लगानीकर्ताहरुले आलोचना गरेका थिए ।