२६ मंसिर/अर्थ र व्यापार– यूरोपियन यूनियनले सन् २०३० सम्ममा ५५ प्रतिशत हरितगृह ग्यास उत्सर्जन कटौती गर्ने भएका छन् ।

ईयूका नेताहरुले यूनियनको मुख्यालयमा भएको वार्तापछि सन् २०३० सम्ममा ५५ प्रतिशत हरितगृह ग्यास उत्सर्जन कटौती गर्ने सहमति गरेको हो ।

यूरोपियन यूनियनका नेताहरुले जलवायू परिवर्तनको मुद्दामा झण्डै आठ घण्टा भन्दा बढी समय बहस गरेका थिए। यूरोपियन यूनियनमा हाल २७ ओटा मुलुक आबद्ध छन् ।

यूरोपेली परिषदका अध्यक्ष चार्ल्स मिकेलले ट्वीटरबाट उक्त सहमतिका बारेमा घोषणा गरेका थिए । उनले जलवायू परिवर्तनका विरुद्धको संघर्षमा यूरोप अग्रणी मुलुक भएको बताए ।

यूरोपेली आयोगका प्रमुख उर्सुला भोन लियेनले भने युरोपले सन् २०३० सम्ममा कम्तीमा ५५ प्रतिशत हरितगृह ग्यास उत्सर्जनमा कमी ल्याउने भन्दै यस कदमले सन् २०५० मा जलवायू तटस्थतातर्फको मार्गमा यूरोप अग्रसर हुने स्पष्ट सन्देश दिएको बताए ।

केही कोइला–निर्भर यूरोपियन मुलुकको समर्थनमा पोल्यान्डले स्वच्छ ऊर्जातर्फको रुपान्तरणका लागि आवश्यक बजेट छुट्याउन आग्रह गरेको थियो ।

जलवायु परिवर्तन सम्बन्धी वार्ताले ब्रेक्जिट वार्तालाई पनि ओझेलमा पारेको थियो ।