९ पुस /अर्थ र व्यापार - चौधरी ग्रुपको समेत स्वामित्व रहेको युगान्डाको होटल ग्रान्ड उबुम्वेको स्वामित्व आजदेखि परिवर्तन हुँदैछ ।  होटलका तीन साझेदारबीच उत्पन्न बिबादका कारण  ऋण उठाउनकालागि रुवाण्डाको केसिबी बैंकले होटल भवनको लिलामी गर्न लागेको हो । बैंकले लिलामी गरेपछि अब किगालीमा रहेको होटलको भब्य भवन नयाँ स्वामित्वमा जानेछ । एक महिना लामो बिवाद र लिलामी प्रक्रियाले आज पूर्णता पाएपछि कम्पनीले तिर्नबाँकी १ करोड ८० लाख डलर केसिबी रुवाण्डाले उठाउने निश्चित भएको छ । केसिबी बैंकले गत सेप्टेम्बरमा रुवाण्डा बिकास बोर्डलाई पत्र लेखी होटलले आफ्नो ऋण नतिर्ने अवस्था देखिएकाले उठाइदिन भनेको थियो ।

बैंकले होटलका साझेदारहरु ऋण तिर्न सक्षम रहेपनि आन्तरिक बिबाद मिलाउन नसक्दा आफ्नो ऋण उठाउनका लागि होटलको भवन लिलामी गर्न माग गरको थियो । तीन समूहको साझेदारीमा खुल्ने भनिएको यस होटलमा संचालन हुनु तीन महिना अघिदेखि नै विवाद सुरु भएको थियो । सिजी कर्पले जिंक ब्राण्ड अन्तर्गत होटल संचालन गर्ने सम्झौता भएपनि अन्य दुई साझेदारले होटल संचालनको तीन महिना अघि नै बहुपक्षीय सम्झौता तोडेको आरोप सिजीले लगाएको छ । गत वर्ष ग्लोबल होटल चेन हिल्टनले यस होटलको व्यवस्थापन लिने समाचार बाहिरिएपछि सिजी कर्प भड्किएको थियो ।

विववादपछि हिल्टन समूहले हेर्ने भनेको होटलको ब्यबस्थापनको काम पनि रोकिएको छ । होटललाई सन् २०१९ को पहिलो त्रैमासिकदेखि डबल ट्रि ब्राण्ड अन्तर्गत ब्यबस्थापन हुने भनिएको थियो । होटलमा रुवाण्डाका मुक्वानो समूहका अलिखान कारमाली, रुवाण्डाको निजी क्षेत्रका ब्यवसायीको महासंघका अध्यक्ष रोबर्ट बाफाकुलेरा तथा चौधरी ग्रुपको सिजी कर्प ग्लोबलका बिनोद चौधरीको स्वामित्व रहेको छ । तीन साझेदारबीच होटलको ब्यबस्थापनका बिषयमा मतभेद भएपछि होटलले बैंकलाई तिर्न बाँकी रकम उठाउन होटलको भवन लिलामी प्रक्रियामा गएको हो ।