२१ असोज/अर्थ र व्यापार – परराष्ट्रमन्त्री एनपी साउदले इजरायलमा हमासको आक्रमणमा परेका नेपालीको उद्धारबारे इजरायली राजदूत हनान गोडरसँग छलफल गरेका छन्।
मन्त्री साउदले राजदूत गोडरलाई आइतबार मन्त्रालयमा बोलाएर आक्रमणमा परेका नेपालीहरुको उद्धार र त्यहाँ रहेका अन्य नेपालीको सुरक्षाबारे छलफल गरेका हुन्।
इजरायलमा शनिबार हमासले गरेको आक्रमणमा परी ९ नेपाली विद्यार्थी घाइते भएका थिए। उनीहरु बंकरमा छन्। विद्रोही समूहको कब्जामा रहेकाले घाइतेले उपचार पाउन सकेका छैनन्।
इजरायलमा हाल साढे ४ हजार नेपाली कार्यरत छन्। राजदूत गोडरले इजरायली सरकारका तर्फबाट नेपालीको सुरक्षा, घाइतेको उपचार र उद्धारमा पूर्ण प्रयास रहने प्रतिवद्धता जनाएको मन्त्री साउदको सचिवालयले जनाएको छ।
इजरायलमा नेपालीको अवस्थाबारे परराष्ट्रमन्त्री साउदले प्रतिनिधि सभाको बैठकमा जानकारी गराउँदैछन्। प्रतिनिधि सभाको बैठक अहिले अपराह्न १ बजे देखि बसेको छ । सोही बैठकले यसबारेमा नेपालको तर्फबाट गर्नुपर्ने थप कार्यबारे निणर्य गर्ने छ ।
तपाईको प्रतिक्रिया