२५ पुस/अर्थ र व्यापार– मेगा बैंक नेपाल लिमिटेडकी प्रमुख कार्यकारी अधिकृत(सिइओ) अनुपमा खुञ्जेली उत्कृष्ट महिला अवार्ड २०२१ बाट सम्मानित भएकी छिन् । काठमाडौंमा विशेष समारोहका बीच आयोजित प्रथम ‘एचआरएम नेपाल अवार्ड फर कर्पाेरेट एक्सिलेन्स २०२१’ मा सीईओ खुञ्जेलीलाई ‘बेस्ट फिमेल अवार्ड २०२१’ प्रदान गरिएको हो । प्रधानमन्त्री शेरबहादुर देउवाले उनलाई सो अवार्ड प्रदान गरेका थिए ।  सो कार्यक्रममा बैंकिङ क्षेत्रमा उत्कृष्ट कार्य गरेबापत मेगा बैंककी सिइओ खुञ्जेलीलाई यो अवार्ड प्रदान गरिएको हो । 
अवार्ड प्राप्त गरेपछि खुसी व्यक्त गर्दै खुञ्जेलीले आयोजकहरुलाई धन्यवाद दिइन् । अवार्डबाट आफूले थप जिम्मेवारी बोध गरेको बताउँदै खुञ्जेलीले यसको श्रेय मेगा बैंकका संस्थापक, सर्वसाधारण शेयरधनी, ग्राहकवर्गहरु, कर्मचारी एवं समस्त सरोकारवालाहरुमा जाने बताइन्। 
यस्तो अवार्ड पाएकी सीईओ खुञ्जेली नेपालको ‘क’ वर्गको बाणिज्य बैंकको प्रथम महिला सीईओ हुन् । उनकै नेतृत्वमा मेगा बैंकले प्रतिष्ठित ‘बैंक अफ दि एयर अवार्ड २०१९’ समेत प्राप्त गर्न सफल भएको थियो । उनी स्थापनाकाल देखि नै मेगा बैंकमा कार्यरत छिन् ।