१५ मंसिर /अर्थ र व्यापार – एनएमबि बैंक एशियाकै उत्कृष्ट बैंक बन्न सफल भएको छ । बुधबार काठमाडौंमा विशेष कार्यक्रम आयोजना गर्दै सो बैंकले एशियाकै उत्कृष्ट बैंक बन्न सफल भएको घोषणा गरेको हो । योसँगै बैंकले ‘बैंक अफ दी एशिया २०२१’ नामक अवार्ड पाएको छ । बैंकलाई लन्डनस्थित फाइनान्सियल टाइम्सले सो अवार्ड प्रदान गरेको हो । यो अर्वाड पाएपछि एनएमबि ‘बैंक अफ दी एशिया’ बन्ने पहिलो नेपाली बैंक बनेको छ ।

सो अवार्ड घोषणा कार्यक्रममा बैंकका प्रमुख कार्यकारी अधिकृत (सीईओ) सुनिल केसीले यो एनएमबी बैंकको गौरवको विषय मात्र नभएर सम्पूर्ण नेपाली सबैको जित भएको बताए । उनले यो उपलब्धि राष्ट्र बैंक, सम्पूर्ण बैंक तथा वित्तीय संस्थाकालागि गौरवको विषय भएको बताए ।
१ शाखा र ३५ कर्मचारीबाट बैंकिंङ सेवा शुरु गरेको यो बैंकले १३ वर्षको यात्रामै यतिठुलो महत्वपूर्ण उपलब्धि हाँसिल गरेको भन्दै उनले बैंकले सुशासन र वित्तीय साक्षरतामा ध्यान दिँदै बोर्ड व्यवस्थापनप्रतिको विश्वासले यो सम्भव भएको बताए ।  यसैगरि, दीगो बैंकलाई मध्येनजर गर्दै एनएमबि बैंकले काम गर्दै गएको बताउँदै उनले विदेशीबाट सबैभन्दा बढी पैसा ल्याउने बैंकका रुपमा रहेको समेत जानकारी गराए । 
अन्य ठूला बैंकले नपाएको यो अवार्ड एनएमबिले पाउँदा निकै खुशी भएको सुनाउँदै उनले नेपालमा पनि थुप्रै काम र योजनामा एनएमबि बैंक पहिलो बैंक बनेको बताए । उनले यस बैंकले नयाँ नयाँ योजना लिएर बैंकिङ क्षेत्रमै योगदान गर्दै आएको जानकारि दिए । 
‘हामीले उर्जामा ठूलो लगानी गरेका छौं, उद्योगमा पनि ठूलो लगानी गरेका छौं, व्यवसाय भन्दा पनि दीगो बैंकिङ कसरी बनाउन सकिन्छ ? त्यसमै हामी काम गरिरहेका छौं,’ केसीले भने ।
यो अवार्डले नेपालको बैंकिङ क्षेत्रलाई थप हौसला र प्रोत्साहन गर्ने उनको भनाई छ । धेरै बैंकहरु नेपालमा लगानी गर्न तयार रहेको र यस अवार्डले थप चुनौति बढाएको उनले बताए । 
बेलायतको लन्डनबाट प्रकाशित हुने प्रसिद्ध म्यागजिन दि बैंकरको निर्णायक मण्डलले यो अवार्डका लागि एनएमबि बैंकलाई छनोट गरेको हो । यस अवार्डको प्रतिस्पर्धामा एशियाका ४८ वटा देशका बैंकहरु सहभागी भएका थिए । अघिल्लो वर्ष पनि ‘बैंक अफ दि इयर २०२०’ को अवार्डबाट एनएमबि बैंक नै सम्मानित भएको थियो । 

अब हाम्रो लक्ष्य विश्वकै उत्कृष्ट बन्ने हो अध्यक्ष : गोल्यान 
यस्तो अवार्ड जित्न सफल भएको जानकारि दिन आयोजत विशेष कार्यक्रममा एनएमबी बैंकका अध्यक्ष पवन गोल्नले आफुहरुले यो अवार्ड जित्नकोलागि एक वर्ष अघि नै निकै मिहिनेतपूर्ण काम गर्न थालेको बताए । हामीले साना साना उद्यमी जन्माउन गरेको प्रेरणादायी कामको परिणाम तथा प्रतिफल नै यो अवार्ड भएको भन्दै उनले अहिले पाएको यस अवार्डले बैंकको जिम्मेवारी थप बढाएको बताए । उनले अझै मुलुकको कृषि क्षेत्रको प्रवद्र्धनमा यस बैंकले धेरै काम गर्नुपर्ने बताए । यसैगरि, उनले अब यस बैंकको लक्ष्य नेपाली जनताको बैंक बन्न चाँहने र बिश्वकै उत्कृष्ट नमुना बैंक बन्ने नै भएको बताए ।