१६ मंसिर / अर्थ र व्यापार- मन्त्री र सांसद भइसकेको व्यक्ति पनि कृषि पेशामा लाग्लान् र भन्ने धेरैले सोच्ने गर्दछन । निकै कम मात्रै नेताहरुले कृषि पेशालाई अंगालेका छन् । तर डा.बाबुराम भट्टराई प्रधानमन्त्री हुँदा भूमिसुधारमन्त्री बनेका तनहुँ बन्दीपुरका भीमप्रसाद गौतमले आफ्नै गाउँ बन्दीपुर गाउँपालिका–१ पिप्लेमा माछापालन गरिरहेका छन् ।

गौतमले डेढ वर्ष अघिदेखि आफ्नै जग्गामा माछापालन शुरु गरेका हुन् । नयाँ शक्ति नेपालका नेता समेत रहेका गौतमले राजनीतिसँगै कृषि पेशालाई अगाडि लैजान माछापालन गरेको बताए । गौतमले राजनीतिपछिको जीवनमा केही काम गर्छु भन्ने लक्ष्य आफूमा पहिलेदेखि नै रहेकाले माछापालन व्यवसाय शुरु गरेको बताए ।

उनको आफ्नै ११ रोपनी जग्गामा माछापोखरी निर्माण गरिएको छ । उक्त जग्गामा पहिला धानखेती हुँदा वार्षिक एक लाख जति आम्दानी हुने गर्दथ्यो । तर माछापालनबाट भने प्रतिरोपनी वार्षिक एक लाखभन्दा बढी आम्दानी हुने गरेको गौतमले बताए ।
गौतम कृषि फार्मको सम्पूर्ण रेखदेख गौतमका ठूला छोरा कुलेन्द्र गौतमले गरिरहेका छन् । पोखरी निर्माणका लागि जिल्ला कृषि विकास कार्यालय तनहुँले एक लाख ६५ हजार अनुदान दिएको थियो । माछापालनका लागि तनहुँको हावापानी उत्कृष्ट रहेकाले यसतर्फ कृषकहरुको आकर्षण बढ्दै गएको कृषि ज्ञान केन्द्र तनहुँले जनाएको छ ।