कात्तिक १४ / अर्थ र व्यापार - आयल निगमका विवादित प्रबन्ध निर्देशक गोपाल खड्कालाई मन्त्रालय झिकाएपछि निगमको कायममुकायम प्रबन्ध निर्देशकमा सुशील भट्टराईलाई जिम्मेवारी दिइएको सचिव देवकोटाले जानकारी दिए ।

भट्टराई १०औँ तहमा कार्यरत निमित्त नायब प्रबन्ध निर्देशक हुन् । वरिष्ठताका आधारमा भट्टराईलाई निगमको जिम्मेवारी दिएको मन्त्रालयले जनाएको छ । उनीसँग निगमको सबैभन्दा ठूलो अमलेगखन्ज डिपो र काठमाडौंस्थित हवाई इन्धन डिपो प्रमुख भएर काम गरेको अनुभव छ । इन्जिनियरिङ क्षेत्रका भट्टराई पेट्रोलियम क्षेत्रमा जानकार मानिन्छन् । निगमको इन्जिनियरिङ र वितरण विभाग सम्हालिसकेका उनी भारतीय आयल कर्पोरेसन (आइओसी) सँग इन्धन खरिद सम्झौता गर्दा मुख्य सदस्य रहने गरेका छन् ।

उनी अन्तर्रा्ष्ट्रिय पेट्रोलियम व्यापारबारे जानकारी राख्छन् । उनी मोतीहारी–अमलेखगन्ज पेट्रोलियम पाइपलाइन परियोजनाको नेपालतर्फका संयोजकसमेत रहेका छन् । मन्त्रालयले यसअघि गोपाल खड्कालाई बर्खास्त गरेपछि उपसचिव प्रेमप्रसाद आचार्यलाई जिम्मेवारी तोकेको थियो । यसपटक चाहिँ भट्टराईको क्षमतालाई बुझेर जिम्मेवारी दिएको सचिव देवकोटाले जानकारी दिए ।