२३ असार/अर्थ र व्यापार– सिम्रिक एयर प्रालिले तेस्रो चरणको कोरोना महामारीलाई ध्यानमा राख्दै उद्दार तथा उपचार कार्यलाई सहज गर्न सुर्खेत बेश क्याम्प बनाएर हेलिकोप्टर सेवा शुरु गरेको छ । 

कम्पनीले सुर्खेत विमानस्थलमा कोभिड एवं अन्य अत्यावश्यक विरामीका लागि आधुनिक उपकरण, दक्ष डाक्टरसँगै हेलिकप्टर तयारी अवस्थामा राखेको छ । 

कम्पनीले दुई  ओटा हेलिकप्टरलाई कोरोना संक्रमितहरुको सेवाका लागि छुट्याएको छ । कम्पनीसँग पाँच ओटा हेलिकप्टर छन् ।

सिम्रिक एयर प्रालिका बजार विभाग प्रमुख योगेश सापकोटाले पश्चिम क्षेत्रका नागरिकको आवश्यकता र मागलाई ध्यानमा राख्दै सुर्खेत विमानस्थलबाट हेलिकोप्टर सेवा शुरु गरिएको बताए । उनले तेस्रो चरणको कोरोना महामारीको तयारीका लागि आवश्यक सरसमान र जनशक्तिसहित सुर्खेत विमानस्थलबाट हेलिकप्टर सेवा शुरु गरिएको बताए । 

कम्पनीले सुर्खेत बेश क्याम्प बनाएर हेलिकोप्टर सेवा शुरु गरेसंगै कर्णाली तथा सुदरपश्चिम प्रदेशका नागरिकका लागि उद्दार तथा उपचारमा सहज हुनुका साथै भाडादर पनि सस्तो पर्ने भएको छ ।