२३ जेठ / अर्थ र व्यापार - सगरमाथा इन्स्योरेन्स कम्पनी र सिद्धार्थ इन्स्योरेन्स कम्पनीले असार १३ गते वार्षिक साधारणसभा डाकेका छन् । दुबैले बोनस शेयरको प्रस्ताव सहित बीमा समितिले निर्देशन गरेको पूँजी जुटाउने भएका छन् । सगरमाथा इन्स्योरेन्स कम्पनीले २२औं वार्षिक साधारणसभाबाट ८६ प्रतिशत बोनस शेयर दिने विशेष प्रस्ताव पारित गर्ने भएको छ । कम्पनीले ४६ करोड २९ लाख रुपैयाँ बोनस शेयर दिएर चुक्ता पूँजी एक अर्ब एक करोड रुपैयाँ पुर्याउने भएको छ । 

बीमा समितिको निर्देशन बमोजिम कम्पनीले ७ जना सञ्चालक कामय गर्ने गरि नियमावली परिवर्तन गर्ने भएको छ । कम्पनीले संशोधनका लागि तयार पारेको नियमावली अनुसार संस्थापक समुहबाट तीन जना संञ्चालक निर्वा्चित हुने छन् । त्यस्तै बिदेशी लगानीकर्ताको समुहबाट एक जना, सर्वसाधारण शेयरधनीहरुको तर्फबाट दुई जना र एक जना स्वतन्त्र संञ्चालक निर्वाचन गर्ने व्यवस्था गरेको हो । 

हाल कम्पनीको संञ्चालक समितिमा ९ जना संञ्चालक रहेका छन्। नियमावली परिवर्तनसँगै सर्वसाधारण समुहबाट एक जना, विदेशी लगानीकर्ताको समुहबाट एक जना र संस्थापक समुहको तर्फबाट एक जना प्रतिनिधि घट्ने छन् साथै एक जना स्वतन्त्र संञ्चालक थप हुनेछ । साधारणसभा प्रयोजनका लागि कम्पनीले असार एक गतेदेखि १३ गतेसम्म बुक क्लोज गर्ने भएको छ । जेठ ३० गतेसम्म शेयर खरिद गर्नेले बोनस शेयर प्राप्त गर्न सक्ने छन् । 

त्यस्तै सिद्धार्थ इन्स्योरेन्स कम्पनीले चुक्ता पूँजीको १५.४८ प्रतिशत बोनस शेयर दिएर बीमा समितिले निर्देशन गरेको पूँजी जुटाउने भएको छ । कम्पनीको हालको चुक्ता पूँजी ८६ करोड ५९ लाख रुपैयाँ रहेको छ । कम्पनीले संस्थापक समुह तर्फ एक र सर्वसाधारण समुह तर्फ एक जना रिक्त संञ्चालक पदमा बाँकी अवधिको लागि भएको सञ्चालकको नियुक्तिलाई अनुमोदन गर्ने भएको छ । साथै संस्थापक समुहको तर्फबाट प्रतिनिधित्व गर्ने तीन जनाको निर्वाचन गर्ने विशेष प्रस्ताव साधारणसभा लगिने भएको छ । साधारणसभा प्रयोजनका लागि कम्पनीले जेठ ३० गतेदेखि बुक क्लोज गर्ने भएको छ । जेठ २९ गतेसम्म कायम शेयरधनीहरुले बोनस शेयर पाउने छन् ।