२० फागुन /अर्थ र व्यापार - ओरिएण्टल इन्स्योरेन्सद्वारा चालू आर्थिक वर्षको दोस्रो त्रैमाससम्ममा ८ करोड ५० लाख रुपैयाँ खुद नाफा कमाएको वित्तीय विवरण सार्वजनिक गरेको छ । गत वर्षको यहि अवधिको तुलनामा नाफा करिब ५ करोड ५० लाख रुपैयाँले बढी हो । ओरिएण्टलले गत वर्ष ३ करोड ६३ हजार रुपैयाँ मात्रै खुद नाफा आर्जन गरेको थियो ।

यस अवधिसम्ममा कम्पनीले ३८ करोड ९ लाख खुद बीमा शुल्क आर्जन गरेको छ । गत वर्षको यहि अवधिमा कम्पनीले ३६ करोड ३९ लाख रुपैयाँ खुद बीमा शुल्क संकलन गरेको थियो । कम्पनीले पुर्नबीमा कमिशनवाट २ करोड ३५ लाख, लगानी कर्जा तथा अन्यवाट ४ करोड ९५ लाख रुपैैयाँ आम्दानी गरेको छ । यस्तै कम्पनीले २७ करोड ७ लाख रुपैयाँ बराबरको खुद दाबी भुक्तानी र पुनर्बीमा कमिशन वापत १ करोड १८ लाख रुपैयाँ खर्च गरेको छ ।

कम्पनीको बीमा कोषमा ५५ करोड ४६ लाख रुपैयाँ र जगेडा कोषमा ३ करोड २० लाख रुपैयाँ सञ्चित छ । गत वर्षको यसै अवधिमा कम्पनीको जगेडा कोष भने अझै ७ करोड ६५ लाख रुपैयाँले ऋणात्मक थियो । यस अवधि सम्ममा कम्पनीले ९ हजार ९४० बीमालेख जारी गरि ४५ करोड ३९ लाख रुपैयाँ कूल बीमा शुल्क आर्जन गरेको छ । यस अवधिमा कम्पनीको ६ हजार १६३ बीमालेख नवीकरण भएका छन् । कम्पनीले ८३२ दाबी वापत २७ करोड ८३ लाख भुक्तानी गरेको छ भने एक हजार १८८ दाबी वापत ५६ करोड ६९ लाख रुपैयाँ भुक्तानी गर्न बाँकी छ ।