२४ माघ /अर्थ र व्यापार - नेपाल हाइड्रो डेभलोपर लिमिटेडले चालु आर्थिक वर्षको दोस्रो त्रैमासमा खुद नाफा घटेको वित्तीय विवरण सार्वजनिक गरेको छ । गत आवको यसै अवधिको तुलनामा हेर्दा खुद नाफा घटेको हो । कम्पनीले जगेडा कोषको आकारमा भने आकर्षक वृद्धि गर्दै एक करोड ८९ लाख बढाएको छ ।

नेपाल हाइड्रो डेभलोपरले यस अवधिमा २ करोड १५ लाख खुद नाफा आर्जन गरेको छ । यो गत वर्षको तुलनामा ३.३० प्रतिशतले कम हो । गत वर्षको यसै अवधिमा कम्पनीले २ करोड २२ लाख खुद नाफा आर्जन गरेको थियो । 

यस अवधिमा २६ करोडको चुक्ता पूँजी स्थिर राखेको कम्पनीले जगेडा कोषमा १३८.१६ प्रतिशतले सुधार गरेको छ । गत वर्ष जगेडा कोषमा एक करोड ३६ लाख सञ्चित गरेको कम्पनीले चालु आर्थिक वर्षको दोस्रो त्रैमासमा ३ करोड २५ लाख रुपैयाँ सञ्चित गरेको छ ।

कम्पनीको विद्युत बिक्रीबाट प्राप्त हुने आम्दानी घटेसँगै कम्पनीको खुद नाफामा गिरावट देखिएको हो । गत वर्ष विद्युत बिक्री मार्फत् ६ करोड ७७ लाख आम्दानी गरेको कम्पनीले चालु आर्थिक वर्षको पुस मसान्तसम्ममा ८५ लाख ९० हजार घटेर ५ करोड ९१ लाख रुपैयाँ मात्र आम्दानी गरेको छ ।
कम्पनीको प्रतिशेयर आम्दानी १७ रुपैयाँ ११ पैसाबाट घटेर १६ रुपैयाँ ५५ पैसा कायम भएको छ । कम्पनीको प्रतिशेयर नेटवर्थ ११२ रुपैयाँ ५४ पैसा र मूल्य आम्दानी अनुपात १४.९८ गुणा बढी छ ।