४ पुस /अर्थ र व्यापार  - मध्य भोटेकोशी जलविद्युत आयोजना (MBJCL ले दुई चरणमा बिक्री गरेको एक करोड ४४ लाख कित्ता साधारण शेयर (आईपिओ) बुधबार एकैपटक बाँडफाँड हुने भएको छ । आयोजनाको शेयर निष्काशन तथा बिक्री प्रबन्धकको जिम्मेवारी लिएको ग्लोबल आइएमई क्यापिटलले बुधबार दिउँसो ३ बजे स्मार्ट क्याफे एण्ड ब्यांक्वेट धुम्बराहीमा आईपिओ बाँडफाँड हुने जनाएको छ ।

कम्पनीले पहिलो चरणमा कात्तिक २८ गतेदेखि मंसिर १४ गतेसम्म कर्मचारी सञ्चय कोषका सञ्चयकर्ताका लागि एक करोड १७ लाख कित्ता र दोस्रो चरणमा मंसिर १९ गतेदेखि २६ गतेसम्म संगठिक संस्थापक संस्थाका कर्मचारीलाई २१ लाख तथा सञ्चय कोषका कर्मचारीलाई ६ लाख कित्ता निष्काशन गरेको थियो ।

मध्य भोटेकोशीले पहिलो चरणमा कर्मचारी सञ्चय कोषका सञ्चयकर्ताहरुबाट एक लाख ३५ हजार ९८६ वटा आवेदनबाट तीन अर्ब ६३ करोड ९५ लाख ३९ हजार रुपैयाँ बराबरको तीन करोड ६३ लाख ९५ हजार ३९० कित्ताका माग आवेदन परेको छ । यस शेयरमा ३.११ गुणा बढी आवेदन परेको हो । यस वर्गका सबै आवेदकले न्यूनतम ८० कित्ता शेयर प्राप्त गर्नेछन् ।

यस्तै, कम्पनीले दोस्रो चरणको संगठित संस्थापक संस्थाका कर्मचारीहरुबाट ९ हजार ५३ जनाले ४५ लाख ३५ हजार ९५० कित्ताका लागि माग आवेदन परेको छ । यस शेयरमा १.६८ गुणा बढी आवेदन परेको छ । तेस्रो चरणमा कम्पनीले आयोजनाबाट प्रभावित स्थानीय सिन्धुपाल्चोकका बासिन्दाका लागि र चौथौं चरणमा सर्वसाधारणका लागि साधारण शेयर खुला हुनेछ ।