२ फागुन/ अर्थ र व्यापार  - लाइफ इन्स्योरेन्स कर्पोरेशन (एलआइसी) नेपालले १८ वर्षदेखि ६० वर्षसम्म उमेरका व्यक्तिले जीवन बीमा गर्न सक्ने ‘जीवन साथी’ नामक नयाँ जीवन बीमा योजना सार्वजनिक गरेको छ ।

बुधबार काठमाडौंमा आयोजित एक समारोहमा बीमा समितिका कार्यकारी निर्देशक राजुरमण पौडेलले नयाँ बीमा योजनाको अनावरण गरे । कम्पनीका सचिव विनोदकुमार भुजेलका अनुसार १५ वर्षे अवधिको यस बीमा योजनामा न्युनतम् बीमाङ्क रकम २ लाख रुपैयाँ कायम गरिएको छ भने अधिकतम् बीमाङ्कको सीमा ‘बीमा अन्डराइटिङ’ को नियमअनुसार जति पनि लिन सकिनेछ ।

बीमा अवधिमा बिमितको निधन भएमा बीमाङ्क र बोनस रकम सम्बन्धित व्याक्तिको श्रीमान वा श्रीमतिले पाउनेछन् ।  बाँकी अवधिका लागि बिमितको श्रीमान वा श्रीमतिलाई कम्पनीले नै बीमाङ्कको ५० प्रतिशत निःशुल्क जीवन बीमा जोखिम बहन गर्नेछ ।

यस योजनामा अधिकतम् ७५ लाख रुपैयाँसम्मको दुर्घटना लाभ र स्थायी अशक्तताको लाभसमेत उपलब्ध रहेको सचिव भुजेलले जानकारी दिए । २ वर्षको बीमाशुल्क भुक्तानी गरेपछि बिमितले कम्पनीबाट कर्जा तथा बीमा समर्पणको सुविधा समेत लिन सक्ने उनले बताए ।

कार्यक्रममा कम्पनीका प्रमुख कार्यकारी अधिकृत एलपी दासले यस योजनामार्फत बिमितले आफ्नो परिवारलाई वित्तीय सुरक्षा प्रदान गर्न सक्ने बताए ।
कम्पनीका नायव प्रमुख कार्यकारी अधिकृत अभिजित घोष दस्तियारले महिला वर्गलाई बीमाको दायरामा ल्याउन यो योजना ल्याइएको बताए ।