२५ कात्तिक/अर्थ र व्यापार– ज्योति लाइफ इन्स्योरेन्सको भोली कात्तिक २६ गते बुधवार तेस्रो साधारण सभा हुने भएको छ ।  

कम्पनीको कर्पोरेट कार्यालय ज्ञानेश्वर, काठमाडौंमा भोली विहान ११ः३० बजेबाट साधारण सभा शुरु हुने कम्पनीले जनाएको छ । 

सभाले आर्थिक वर्ष २०७५/७६ को प्रतिवेदन पारित गर्नुका साथै सर्वसाधारणका लागि आईपीओ जारी गर्ने प्रस्तावसमेत पारित गर्ने कम्पनीले बताएको छ । कम्पनीले सर्वसाधारणका लागि थप रू. ६६ करोड बराबरको आईपीओ विक्री गर्नेछ ।

चालू आर्थिक वर्षको पहिलो त्रैमाससम्म कम्पनीले रू. ७ करोड २२ लाख २२ हजार खुद नाफा गरेको छ । हाल कम्पनीको संस्थापकतर्फको बाट चुक्ता पूँजी रू. १ अर्ब ५४ करोड रहेको छ ।

चालू आर्थिक वर्षको पहिलो त्रैमाससम्म कम्पनीको जगेडा कोष रकम रू. ४६ करोड ५ लाख ३४ हजार छ । 
विसं २०७४ साल भदौ १९ गतेदेखि बीमा बजारमा कारोबार शुरु गरेको ज्योती लाईफले पहिलो त्रैमाससम्म रू. ३ अर्ब ७३ करोड ७७ लाख कुल बीमाशुल्क आर्जन गरेको छ । 

कम्पनीको हाल प्रतिशेयर आम्दानी रू. १८ दशमलव ७६ र प्रतिशेयर नेटवर्थ रू. १३३ दशमलव २३ रहेको छ ।