३१ जेठ / अर्थ र व्यापार- इन्फिनिटी लघुवित्त वित्तीय संस्था र नेपाल एग्रो लघुवित्त वित्तीय संस्थाले आपसमा गाभिने प्रस्ताव अनुमोदनका लागि साधारणसभा डाकेका छन् । इन्फिनिटी र नेपाल एग्रोले असार २१ गतेका लागि साधारणसभा डाकेका हुन् । 
इन्फिनिटी लघुवित्तको साधारण सभाले नेपाल एग्रोको १०० कित्ता बराबर इन्फिनिटीको ९८ कित्ता सेयर कायम हुने प्रस्तावलाई पनि अनुमोदन गर्ने छ । 

इन्फिनिटीको यो विशेष साधारणसभा हो । त्यस्तै नेपाल एग्रोको भने यो नियमित साधारणसभा हो । कम्पनीले साधारणसभाबाट संस्थापक समूहबाट चार जना सञ्चालक चयन गर्ने छ । यसबाहेक चुक्ता पुँजी ५ करोड ७२ लाख रुपैयाँको १४ प्रतिशत बोनस सेयर दिने प्रस्ताव पनि पारित गर्ने छ । पारितपछि चुक्ता पुँजी ८० लाख रुपैयाँले बढ्ने छ ।

इन्फिनिटीको २६ करोड ६ लाख र नेपाल एग्रोको ६ करोड ५२ लाख जोडिएपछि एकिकृति कारोबार गर्ने संस्थाको चुक्ता पुँजी ३२ करोड ५९ लाख रुपैयाँ पुग्ने छ ।