२४ मंसिर/ अर्थ र व्यापार - भारतीय केन्द्रीय बैंकका गभर्नर उर्जित पटेलले राजीनामा गरेपछि त्यसको असर नेपाली रुपैयाँमा देखिएको छ । नेपाली रुपैयाँ एकै दिन एक रुपैयाँ ८६ पैसा सस्तिएको छ । 

सोमबार एक अमेरिकी डलरको मूल्य ११३ रुपैयाँ ५९ पैसा थियो । राजीनामा सार्बजनिक भएपछि डलरको भाउ बढेर ११४ रुपैयाँ ४५ पैसा पुगेको थियो । अहिले डलरको भाउ ११५ रुपैयाँ ४५ पैसा नाघिसकेको छ । भारतीय मुद्रासँग नेपाली रुपैयाँको स्थिर बिनिमय दर रहेका कारण डलरसँग भारु तलमाथि हुँदा नेपाली रुपैयाँमा प्रत्यक्ष असर पर्छ । भारतीय सञ्चार माध्यमहरुका अनुसार, गभर्नरको नयाँ नियुक्तिअघिसम्म डलरको भाउ अझै बढ्ने छ ।

पटेलको राजीनामाले भारतीय शेयर बजार नराम्ररी प्रभावित भएको छ । मंगलबार बजार खुल्ने बित्तिकै सेन्सेक्स ३०० अंकले झरेको छ भने निफ्टी ९० अंक तल आएको छ । पाँच राज्यमा भएको चुनावको नतिजाले भारतीय जनता पार्टीको कमजोर उपस्थिति देखिएपछि बजार सम्हालिएको छ ।

विश्लेषकहरुका अनुसार, पटेलको राजीनामापछि भारतीय अर्थतन्त्रमा समस्या आउन सक्छ । उनीहरुले राजीनामाको समयलाई लिएर प्रश्न उठाइरहेका छन् । पटेलले पाँच राज्यको चुनावी नतिजा आउने एक दिनअघि राजीनामा दिएका छन् भने केन्द्रीय चुनाव आउन केही महिना मात्र बाँकी छ ।