९ पुस/ अर्थ र व्यापार - हाइड्रोईलेक्ट्रीसिटी इन्भेष्टमेन्ट एण्ड डेभलपमेन्ट कम्पनी (HIDCL) ले पहिलो पटक आफ्ना शेयरधनीलाई १० प्रतिशत बोनस शेयर वितरण गर्ने प्रस्ताव गरेको छ । यसअघिका दुई वर्ष कम्पनीले ५ प्रतिशतका दरले नगद लाभांश वितरण गरेको थियो ।
साथै कम्पनीले बोनसपछि कायम हुने चुक्ता पूँजीको शतप्रतिशत हकप्रद प्रस्ताव समेत गरेको छ । कम्पनी सञ्चालक समितिको पुस ८ गते बसेको १७४ बैठकले कम्पनीको चुक्ता पूँजी दश अर्ब रुपैयाँको १० प्रतिशतले हुन आउने एक अर्ब बराबरको बोनस शेयर र बोनसको कर प्रयोजनका लागि २ करोड १० लाख ५२ हजार ६३१ रूपैयाँ ५८ पैसा रुपैयाँ नगद लाभांश वितरण गर्ने प्रस्ताव गरेको छ । साथै सोही बैठकले बोनस पश्चात कायम हुने चुक्ता पूँजी ११ अर्बको एक बराबर एक (१ः१) शेयर अनुपातमा हकप्रद शेयर जारी गर्ने प्रस्ताव पनि गरेको छ ।
बोनस तथा हकप्रद प्रस्ताव प्रस्तावहरु पारित गर्न कम्पनीले पुस ३० गते नेपाल प्रज्ञा प्रतिष्ठा, कमलादी काठमाडौंमा बिहान ११ बजे सातौं वार्षिक साधारण सभा बोलाएको छ । यस्तै साधारण सभा प्रयोजनका लागि कम्पनीले पुस १७ गते बुकक्लोज गर्ने जनाएको छ । यसअनुसार पुस १६ गते सोमबारसम्म कायम शेयरधनीले कम्पनीको बोनस पाउनेछन् । १० अर्ब चुक्ता पूँजी रहेको कम्पनीको बोनस र हकप्रद पश्चात २२ अर्ब रुपैयाँ चुक्ता पूँजी पुग्नेछ । चालु आर्थिक वर्षको पहिलो त्रैमाससम्ममा कम्पनीले २७ करोड ३७ लाख ४६ हजार रुपैयाँ खुद नाफा कमाएर प्रतिशेयर आम्दानी १० रुपैयाँ ९५ पैसा कायम गरेको छ ।
यस कम्पनीमा ८० प्रतिशत सरकारको लगानी छ भने सर्वसाधारणको हिस्सा २० प्रतिशत रहेको छ । हाइड्रोपावर परियोजनाहरुको विकास तथा ऋण लगानी गर्ने काम यस कम्पनीले गर्दै आएको छ । आगामी दिनमा हाइड्रोपावरका थुप्रै परियोजना बनाउन लगानी गर्नुपर्ने भएकाले कम्पनीले चुक्ता पुँजी बलियो बनाउन लागेको हो । वि.सं २०७२ कार्तिकमा २ अर्बको साधारण शेयर जारी गरेको यस कम्पनीले हालसम्म बोनस वितरण गरेको थिएन।
कम्पनीमा नेपाल सरकारको ५ अर्ब, सर्वसाधारणको २ अर्ब तथा नागरिक लगानी कोष, राष्ट्रिय बीमा संस्थान र कर्मचारी सञ्चय कोषको १(१ अर्ब रूपैयाँ लगानी रहेको छ । साबिकको जलविद्युत लगानी तथा विकास कम्पनीले नाम परिवर्तन गरि हाइड्रोईलेक्ट्रीसिटी इन्भेष्टमेन्ट एण्ड डेभलपमेन्ट कम्पनी बनाइएको हो ।
तपाईको प्रतिक्रिया