२६ चैत्र /अर्थ र व्यापार - हिमालय ऊर्जा विकास कम्पनीको आईपिओमा ३.७६ गुणा बढी आवेदन परेको छ । चैत्र २० गतेदेखि आईपिओ निष्काशन गरेको कम्पनीको शेयरमा दिन अन्तिम दिन चैत २५ गते सोमबारसम्ममा सो माग परेको हो ।

बिक्री प्रबन्धक नबिल इन्भेष्टमेन्ट बैंकिङ्गका अनुसार अन्तिम दिन चैत २५ गते सोमबारसम्म ५१ करोड ३७ लाख ५५ हजार रुपैयाँको आवेदन परेको छ । ७२ हजार बढी आवेदनबाट ५१ लाख ३७ हजार ५५० कित्ता शेयर माग भएको बिक्री प्रबन्धकले जनाएको छ ।
आईपिओमा न्यूनतम ५० कित्ताका लागि पाँच हजार रुपैयाँदेखि अधिकतम ६ हजार ५०० कित्ताका लागि ६ लाख ५० हजार रुपैयाँ सम्मको आवेदन दिन पाइने व्यवस्था थियो । आईपिओलाई क्रेडिट रेटिङ्ग एजेन्सी इक्रा नेपालले औसतभन्दा तल आधारहरु जनाउने इक्रा एनपि आईपिओ ग्रेड ४ रेटिङ्ग दिएको छ ।

कम्पनीले प्रतिकित्ता १०० रुपैयाँ दरले १३ लाख ६६ हजार २०० कित्ता शेयरमा सर्वसाधारणबाट आवेदन माग गरेको थियो । कम्पनीले जारी पूँजी ९९ करोड रुपैयाँको १५ प्रतिशत अर्थात १४ करोड ८५ लाख रुपैयाँ बराबरको १४ लाख ८५ हजार कित्ता साधारण शेयर बिक्री खुला गरेको थियो । जसमध्ये ४४ हजार ५५० कित्ता कर्मचारीहरु र ७४ हजार २५० कित्ता सामूहिक लगानी कोषहरुलाई छुट्याइएर बाँकी शेयर सर्वधारणमा बिक्रीमा ल्याएको हो ।

कम्पनीले रामेछाप र दोलखा जिल्लाको सिमा भएर बहने खिम्ति खोलामा कम्पनीले १२ मेगावाटको उपल्लो खिम्ति र ७ मेगावाटको अपर खिम्ति– आई आई गरी कुल १९ मेगावाटका आयोजनाहरु निर्माण गरिरहेको छ । विवरण पत्रमा उल्लेख भए अनुसार १९ मेगावाट निर्माण गर्नको लागि लागत करिव ३ अर्ब १५ करोड रहेको छ । यसरी हेर्दा प्रति मेगावाट लागत करिब १६ करोड ५६ लाख मात्र रहेको छ भने दुवै आयोजना यहि २०७६ आषाढ मसान्तमा सम्पन्न हुने उल्लेख छ ।